ORANJESTAD – Awe mainta Hues di Corte di Husticia a dicta sentencia den e caso sumario cu Claudius Philips a cuminsa contra Daury Rodriguez.
ARUBANATIVE por a compronde cu Hues ta haya cu Daury a tacha e bon nomber y honor di Claudius y a ordena Daury pa rectifica riba facebook y cu e rectificacion aki mester keda minimo 2 siman.
SENTENCIA
Hues ta mustra cu Claudius ta un musico conoci cu tin masha hopi toca cu su grupo Oreo. El a mustra cu na 2011, Corte di Husticia a condena Claudius pa tabatin den su laptop, pornografia di mucha.
Dia 21 di Juni 2022, “Old Musicians From San Nicolas” a pone riba facebook cu lo bay homenagea Claudius riba 16 Juli 2022. Daury a coy e informacion aki y pone riba facebook: “But Pedophiles Get Honored”. Hues ta mustra cu abogado di Claudius, mr. Mohamed, a manda Daury carta pa e rectifica e acusacion aki pasobra nunca Claudius a wordo condena pa pedofiel. Daury a reacciona: “See you in Court Claudius Philips”. “Esaki lo bira un kortegeding di: E muchanan cu a wordo marca for life door di monsters contra 1 di e monsternan”.
EVALUACION DI HUES
Hues den su evaluacion di e caso ta mustra cu den e caso aki tin dos punto cu ta para contra otro.
E promer ta e derecho di expresion liber, cu ta para den nos constitucion. E di dos ta prohibi e derecho pa haci expresion liber pasobra e ta tacha bon nomber di hende.
Hues ta mustra cu e nomber pedofiel den pueblo ta conoci pa un persona cu a abusa sexual di un mucha y ta wordo masha menosprecia den comunidad.
TACHA BON NOMBER
Hues ta haya cu e publicacion di Daury, cu ta yama Claudius pa pedofiel, ta tacha e bida personal di Claudius masha severo. Hues ta mustra cu segun Daury, e hecho cu a condena Claudius pa pa pornografia di mucha, ta suficiente pa considera Claudius un pedofiel.
Hues no ta di acuerdo cu e ponencia aki. Hues ta haya cu Daury no tin ningun prueba pa ta yama Claudius pa pedofiel. El a mustra cu e video cu abogado di Daury a presenta den Corte no ta sirbi como prueba. Hues a mustra cu riba e video por mira un persona cu bo no ta mira bon y cu a keda anonimo. E persona ta papia di algo cu lo a pasa tempo cu e tabatin 7 aña pero no ta describi kico lo a pasa cu lo por cualifica como abuso sexual.
Hues a bisa cu e ta aproba e demanda di Claudius contra Daury.
DECISION
Hues a ordena Daury pa dentro di 24 ora cu Daury a ricibi e sentencia, e mester kita loke el a pone riba facebook di Claudius y pa esaki keda for di facebook. Hues a ordena pa Daury paga daño na Claudius di 500 florin pa cada dia cu e no cumpli cu e orden aki, te un maximo di 25 Mil Florin.
Hues a ordena Daury pa dentro di 24 ora cu Daury a ricibi e sentencia, pa e publica e rectificacion, sin pone comentario of reaccion riba e pagin di facebook di Daury. Esaki mester keda publica riba e pagina di facebook di Daury pa minimo 2 siman. E rectificacion ta:
“Den e veredicto den caso sumario di e Hues di Corte di Promer Instancia di Aruba di fecha 10 Augustus 2022, mi a wordo condena pa pone un rectificacion relatando na e acusacion cu mi a haci contra di Claudius Alvin Philips, esta cu e ta un pedofiel of abusador di mucha. Huez a conclui cu pa e acusacion ey no tin base, y/of cu e acusacion aki ta un acto inhusto pasobra sin prueba ta ataka e honor y e bon nomber di Claudius Philips”.
Tambe Hues a ordena pa Daury paga e gastonan di e caso sumario na banda di Claudius.