Home Politics Minister Maduro ta informa riba evaluacion exitoso di CFATF: Aruba a...

Minister Maduro ta informa riba evaluacion exitoso di CFATF: Aruba a traha na un manera structura pa identifica y mitiga riesgonan asocia cu labamamento di placa y financiamento di terorismo

SHARE

 

 

A produci un National Risk Assessement y un National Strategy Report

 

Aruba su evaluacion door di CFATF tabata exitoso danki na e hecho cu como Pais nos ta traha na manera structura y cu miras pa futuro. Den e cuadro aki Aruba a traha riba un trayecto pa por identifica, conoce y dirigi esfuerso pa mitiga e risiconan asocia cu labamento di placa y financiamento di terorismo. E maneho ta dirigi riba e riesgonan cu nos Pais ta wordo confronta cu ne. E trabounan aki a keda compila den un National Risk Assessement y un National Strategy Report.

 

National Risk Assessement

Na 2018, Aruba a cuminsa traha riba un ‘National Risk Assessement’ NRA den cual, na manera sistematico ta inventarisa posibel riesgo riba e tereno di labamento di placa y financiamento di terorismo. E NRA pa Aruba a wordo lidera y financia pa Banco Central. FIU Aruba tabatin un rol pa yuda coordina e proceso. E assessment aki tabata un trabou grandi den cual hopi stakeholders tabata envolvi y nan input tabata sumamente bon y particularmente valioso. E NRA riba labamento di placa a keda finalisa na februari 2021 y esun cu ta toca e risconan pa financiamento di terorismo y proliferacion di arma di destruccion masal, a keda finalisa na juni 2021.

 

National Strategy Report

E resultado di e NRA, a sirbi tambe pa por delinea un strategia nacional pa por preveni y combati labamento di placa y financiamento di terorismo na Aruba. Den e NRA a indentifica algun risico y vulnerabilidad di nos Pais pa cual mester tuma algun paso pa por evita cu e risiconan aki presenta nan mes. E strategia nacional lo ta e guia di e stapnan cu mester tuma pa asina sigura cu Aruba por keda cu e bon reputacion manera a keda confirma recientemente pa e evaluacion di CFATF. Aruba ta na di dos luga den Caribe cu un sistema efectivo pa preveni y combati labamento di placa, financiamento di terorismo y proliferacion di arma di destruccion masal. 

 

Resumen di NRA riba www.gobierno.aw

Debi na e informacion delicado y strategico pa Aruba, e rapport di NRA ta uno confidencial y solamente un resumen por wordo publica. E resumen ta duna un bista di e categoria di nos riesgonan como Pais y ta publica riba website official di Pais Aruba, www.gobierno.aw.