San Nicolas: Diahuebs den oranan di atardi a tuma lugar e entiero di e conocido musico Arubiano Antoni Gario.
E entiero a tuma lugar den Misa Santa Theresita na San Nicolas.
Den oranan di merdia e la wordo hiba na misa unda su famia, amigonan y conocirnan por a despedi di dje, despues a sigui un sacrificio di misa como despedida. Locual a resalta tabata e cantidad di persona bisti na Roos, e motibo tabata como cu Gario su color preferi lo tabata roos. (Pink for Life) Segun nos a compronde pa su despedida nan a bisti’e un set di bachi roos.
Despues e stoet a sali bou vigilancia di polis, por a scucha poco musica (no duro) y algun auto tabata decora cu blaas, nan a bay direccion di e cas caminda Antoni Gario tabata biba den Orinocostraat. Na e cas nan a keda un rato y despues a bay bek direccion di e Funeraria, Pray Funeral Home, pa su cremacion, den presencia di famia y amigonan.
Wilfred Antoni Gario a pone fin na su bida den un cel na Warda di Polis na Shaba, dia 19 di Juni ultimo den oranan di mainta. Esaki a sosode dos dia despues cu e la wordo deteni como sospechoso di un caso di abuso sexual.
Den e mundo di musica na Aruba, Gario tabata hopi conoci y exitoso, e tabata tin su propio banda Le Groove cu especialmente den e temporada di Carnaval tabata hopi popular. Antoni Gario tabata un persona conoci y tabata tin un grupo grandi di fans.
