-Den cuadro di e Dia di Abolicion di Sclavitud riba 1 di juli, Minister di Cultura ta informa cu Archivo Nacional Aruba tin den nan archivo un carta di libertad di esclavo y te ainda esaki ta e unico ‘vrijbrief’ cu ta conoci na Aruba. E ‘vrijbrief’ ta di e esclavo Anna Stacia Helder cu riba 1 di juni 1863 a haya su libertad na momento cu sclavitud a wordo aboli den e colonianan Hulandes. Anna Stacia Helder ta tanta di Garibaldi “Ba” Helder y como mucha muher di 11 aña a haya su libertad for di sclavitud na Aruba.
Archivo Nacional di Aruba a ricibi e vrijbrief di Anna Stacia Helder como un obsekio di sra. Benita Davelaar-Helder, kende a hereda e documento valioso aki di su tata Rafael Helder (1911-1997). Rafael Helder na su turno a hereda e carta di libertad di su tata Nicasio Helder (1879-1967), un sobrino di Anna Stacia Helder.
E aña aki dia 1 di juli ta conmemora e di 159 aña di abolicion di sclavitud door di Hulanda den e colonianan Surinam y Antias Hulandes. Aruba tambe a conoce sclavitud y pesey e historia di sclavitud mester haya su debido atencion den historia di Aruba.
FIN
2022JULI-01