Y otro aña, nos lo yega nivelnan di prome cu pandemia.
Na comienso di su discurso dirigi na pueblo di Aruba diadomingo ultimo, Prome Minister Evelyn Wever-Croes a expresa: “Como Gobernante bo mester e curashi pa acepta e realidad, comprende e diferencia y goberna no cu ilusion pero cu realismo y vision di optimismo pa produci solucion duradero’.
Y esaki ta e manera cu Gabinete Wever-Croes ta goberna y dirigi nos pais. Ora cu Aruba a sali di punto mas critico di e pandemia, y nos a kere cu nos por recupera trankilamente, nos a wordo confronta cu otro crisis, e conflicto na Ukraina, cu efectonan devastador pa henter mundo. Prijsnan di crudo y gasolin a aumenta drasticamente den tur pais. Na Aruba tambe, pasobra Aruba ta importa e gasolin. Prijsnan di productonan den supermercado tambe a cuminsa aumenta, pasobra na e pais cu nan ta wordo produci tambe nan a aumenta. Y nos ta importa e productonan aki combina cu e efectonan economico.
A pesar di e realidad critico aki, Gabinete Wever-Croes II a mantene su vision y direccion di maneho consistentemente y ta mirando cu Aruba ta riba e caminda pa recuperacion. Nos recuperacion awor ainda ta basa riba recuperacion di nos turismo, cual ta bayendo hopi bon. Nos a cera ultimo luna, mei 2022, cu mas bishitante cu e mesun luna na 2019, y nan ta gasta mas tambe den nos economia.
Minister Dangui Oduber su maneho ta pa percura cu e tendencia aki continua, y den e caso aki nos ta calcula cu nos lo finalisa e aña aki cu un recuperacion entre 90 pa 95% di nos turismo, y otro aña, nos lo yega nivelnan di prome cu pandemia.
Nos sa cu turismo so no por carga nos economia aunke con bunita e cifranan por ta mustra awor. P’esey, cada Minister di Gabinete Wever-Croes ta trahando incansablemente pa fortifica nos economia y crea un futuro cu no ta persigui pa pasado, pero cu ta crea oportunidadnan nobo pa progreso y bienestar sostenible y duradero.
“Aruba ta den recuperacion, y esey ta danki na nos esfuerso conhunto, pa nabega e olanan halto di temponan aki cu realismo, curashi y optimismo. Mi ta gradici pueblo di Aruba cu ta enfoca riba e desaroyo positivo di nos pais. Irespecto con difícil cosnan por ta awor, solo lo sali bek y cu energia y forsa renoba, pa nos traha hunto na progreso y bienestar di tur nos ciudadanonan”, Prome Minister Evelyn Wever-Croes a expresa.