Home Police Autoridad a drenta dos cas den Village, cas di mama y yiu

Autoridad a drenta dos cas den Village, cas di mama y yiu

SHARE

Polis hunto cu Ministerio Publico trahando duro pa combati bendemento di droga den barionan na Aruba

Caya Saba, San Nicolas:
Diamars den oranan di mainta autoridad a drenta dos cas pareu den Caya Saba, tabata trata di cas di un mama y su yiu, den e bario nan lo ta conoci pa bendemento di droga.

E yiu lo ta un conoci di polis, segun nos a compronde cu lo a confisca un cantidad grandi di droga for di ambos cas. Den pasado lo a yega di haci entradanan hudicial caba na cas di e yiu, pero e biaha aki nan a drenta cas di e mama tambe.

Polis ta hopi activo referente e proyecto di combatimento di bendemento di droga den barionan, Project team drugspanden.
E proyecto aki ta trahando abase di tipsnan cu polis ricibi y asina nan ta cuminsa build un case y na momento cu nan ta cla cu nan investigacion, nan ta actua.

Tur siman husticia ta man yen drentado casnan caminda droga ta wordo bendi, tambe riba caya nan ta detene e delivery boysnan cu ta sali entrega e droga te na porta di cas di e cumprado.

Autoridad ta vigilando no solamente casnan, pero tambe personanan cu ta core rond den auto pasa bende/deliver droga di porta pa porta. E cumprado ta haci su pedido y e droga ta wordo treci te na porta di su cas. Te hasta tin e sistema di bendemento di droga estilo drive thru, pasa na un bentana cumpra droga.

Tur cos ta mustra cu bendemento di droga ta un negoshi grandi den nos barionan di Aruba, siman pasa diahuebs, autoridad a drenta 5 cas den un solo atardi y a score grandemente riba e baho mundo di droga.

Mas sigur lo por spera mas entradanan hudicial den e dianan y simannan nos dilanti, na casnan caminda droga ta wordo bendi y tambe detencion di esunnan cu ta core rond hiba of bende droga.

Lamentabelmente ni cuanto cas autoridad drenta, crioyamente bisa, ” tin hopi hende ainda no ta coy curpa” y ta sigui bende droga y deliver droga te ora nan number hunga.