Den Haag – Na Arubahuis a tuma lugar un recepcion ameno pa Miriam Croes cu tabata colaboradora na e departamento huridico di Arubahuis. Miriam Croes despues di casi trinta aña di a traha na Arubahuis a dicidi pa baha cu VUT y despues bai cu pensioen.
Na e ocacion aki Minister Plenipotenciario Guillfred Besaril a tene un discurso den cual ela cuminsa na bisa cu Miriam ta bendiciona pa yega e edad pa stop cu trabao y drenta un fase nobo den su bida. ‘Kisas esaki ta final di un carera professional, pero bida a siñami cu esaki ta inicio di un segunda bida. Por ehempel cu bo ta bai baiha hopi y dorna bo paspoort cu yen di stempel of bo ta afilia na un organisacion caricativo manera un Kankerfonds, Kiwanis of Quota Club. Pasobra bo a yega na e momento priviligia den bo bida cu nada no mester mas. Pero abo ta escohe kico bo ta haci pa yena bo agenda. Y esey ta algo masha bunita mes,’ asina sr. Besaril a bisa.
Por ultimo Minister Besaril a desea Miriam Croes tur clase di exito den e fase nobo aki di su bida y a gradici Miriam pa tur su añanan di servicio pa Pais Aruba.
Hurista di Arubahuis Shandra John como colega cerca di Miriam Croes tambe a hiba palabra. Shandra a bisa banda di conoce Miriam di Aruba caba, bida a haci buelta cu e y Miriam a bira colega den e departamento huridico di Arubahuis. Den su discurso Shandra tabata tin hopi aprecio pa Miriam den su trabao y den su colegialidad, tambe cu e otro departamentonan den Arubahuis.
Despues di e parti aki a pasa over pa entregamento di regaldo. Minister Besaril a haci entrega di e regaldo di e personal di Arubahuis y Shandra John a duna Miriam un regalo personal como aprecio.
Miriam den su palabra di gradicimento a bai bek na e aña 1995 den cual ela tuma e desicion di pidi un “overplaatsing” pa bin traha na Arubahuis. ‘Mi ta considera esaki e mihor decision den mi bida. Na Arubahuis mi a traha cu hopi amor y dedicacion pa mi trabao como assistente y secretaria di e Representante di Aruba pa Union Europeo y despues como colaboradora na e departamento huridico di Arubahuis. Den tur e añanan aki mi a experencia hopi eventonan ameno cu personal. Tambe un decision cu pami tabata hopi grandi ta pa cana e Vierdaagse di Nijmegen y cu orguyo mi a logra di haya e “Vierdaagsekruisje”.
Finalmente Miriam a gradici tur su coleganan pa nan cooperacion y colegialidad ricibi durante di e 27 aña di a traha na Arubahuis.
Despues a sigi un recepcion ameno cu tabata tin ABBA como tema.
Nota pa redacion: E potretnan ta cortesia di Arubahuis