ORANJESTAD: Diaranson ultimo Minister Endy Croes a haci bishita oficial na scol basico Washington, na yegada e mandatario a wordo ricibi pa cabesante sra. Sharine Curiel. Cu hopi alegria y entusiasmo e alumnonan, docentenan y empleadonan tabata en espera di e mandatario. Scol basico Washington ta conta cu 445 alumno y scol primario Washington tin alrededor di 200 alumno.
Scol basico Washington ta celebra den luna di augustus e aña aki 25 aña di existencia y ta pasando den momentonan di renobacion. Minister Endy Croes a expresa cu tempo ta dificil pero cu hopi creatividad a percura pa pone man na obra y drecha algun scol na Aruba cu tin mester di atencion urgente. E proyecto di renobacion a inicia final di maart 2022 y tin un duracion di diesun luna unda lo renoba e daknan, ‘plafond’ y luznan di e scol. Alabes a inverti den shete unit mobulair pa asina muda e prome seis klasnan den e unitnan aki pa crea espacio pa renobacion di e daknan. Asina esaki termina lo aloca e seis klasnan den nan localnan renoba y lo pasa seis otro klas pa e unitnan mobulair.
Director di DOW sr. Marlon Croes a indica cu e trabou di renobacion lo den tres fase. Den e prome fase lo cambia daknan di seis lokaal y e podium cu material alternativo y mas sostenibel. E di dos fase ta e otro seis lokal y oficina y e ultimo fase ta e scol primario Washington y gymzaal. Freman N.V. ta compania cu cambiando e dak y departamento di ‘uitvoer’ di DOW ta esun cu ta supervisando e trabou.
Por ultimo cabesante di scol basico Washington sra. Sharine Curiel a enfatisa cu e scol ta cumpli 25 aña di existencia den luna di augustus proximo y como tal nan ta hopi contento cu e trabounan ta tumando luga y cu sigur e daknan nobo lo por wanta un minimo 15 aña sin ningun problema.
