ORANJESTAD – Awe mainta e homber P.S., a presenta dilanti Hues pa e caso penal cu Ministerio Publico a cuminsa contra dje. Fiscal ta acusa P.S. cu entre Juni 2019 y 13 Januari 2021 a laba placa.
ARUBA NATIVE por a compronde cu Fiscal a exigi pa e mas cu 100 mil florin keda confisca y un castigo condicional pa P.S. Abogado mr. D.Kock a cuestiona e forma di investigacion hiba pa Fiscal y ta haya cu no tin ningun prueba di labamento di placa sino cu P.S. a gana placa hungando poker. El a pidi Hues pa declara P.S. liber y pa debolbe e placanan confisca.
Hues a mustra cu relaciona cu e caso Avestruz, Polis a bay haci un investigacion na La Hacienda cu ta e oficina di tata di P.S. Den e safe a haya 25 mil dollar y algo mas di 60 mil florin. P.S. a bisa e agentenan cu e placa ta di dje y no su tata. Door cu P.S. no por a prueba procedencia di e placa, autoridad a sospecha cu ta placa procedente di labamento di placa y a confisca esaki.
Durante tratamento di e caso a sali na cla cu P.S. ta un hungador di poker profesional cu a gana dos renchi di torneonan internacional di poker. El a splica Hues cu desde 2010 e ta hungando poker y tabata spaar su placa. Na 2019 el a cuminsa deposita placa den e safe di su tata na e oficina. Hues a mustra cu autoridad a haci investigacion di 2019 pa 2021 y a constata cu na Rio y Hilton, P.S. a gana diferente weganan di poker. P.S. a reclama pakico no a bay check na Holliday Inn caminda e tabata hunga desde 2010.
Tambe P.S. a mustra Hues 2 renchi cu e ta bisti cu el a gana den torneo interionacional di poker. El a bisa cu el a hunga y gana na Las Vegas y cu el a hunga tambe na Paris, Hulanda, Miami, Colombia y Curacao.
Fiscal a bisa Hues cu segun ley, P.S. mester demostra di unda el a haya e placanan aki. El a menciona sentencianan di Corte Supremo caminda ta bisa cu sospechoso mester splica con a gana placa, cuanto placa y den ki periodo.
E ta haya cu no tin suficiente indicacion di unda tur e placanan aki a sali. Fiscal a bisa Hues cu e no ta kere cu P.S. a gana torneo poker den exterior. E no por prueba esaki. Fiscal ta haya proba cu P.S. ta laba placa. El a exigi pa e algo mas cu 100 mil florin keda confisca y 1 luna di prison condicional cu 2 aña di prueba pa P.S.
Abogado mr. D.Kock a cuestiona e forma con Fiscal a hiba investigacion. E ta haya cu investigacion di Polis ta mustra claramente cu P.S. ta un hungador profesional di poker y cu el a gana hopi placa den casinonan aki na Aruba. Esey sin conta den exterior.
E abogado a sigui bisa cu for di investigacion ta mustra cu den 2 aña so, P.S. a gana 40 mil dollar den dos casino na Aruba. Esey, sin papia di weganan international y na Holliday Inn. E abogado a bisa Hues cu pa hunga, mester deposita sumanan grandi. Esey ta mustra cu e calculacion di Fiscal no ta cuadra. El a bisa cu den un casino so, P.S. a deposita mas cu 62 mil florin. Awor con por bisa cu e placa ta procedente di fuentenan ilegal, manera Fiscal ta pretende. El a conclui cu Hues mester declara P.S. liber y orden Fiscal cu tur e placanan confisca mester debolbe.
Hues a sera tratamento di e caso y a bisa cu 5 Mei pa 8.15 lo tin sentencia.