ORANJESTAD – Awe mainta den Corte di Husticia a sigui cu e parti pro forma di caso Avestruz.
ARUBA NATIVE por a compronde cu un Hues di Hulanda, a bin Aruba special pa trata e caso Avestruz, a sigui cu e parti pro forma di e caso penal contra e 12 sospechosonan. Den sala di Corte tabata presente e abogadonan pero manera tabata e caso anterior, e sospechosonan no a presenta. E abogadonan a notifica na e caso anterior cu nan a conseha nan clientenan pa no presenta ainda den Corte te dia di tratamento di e caso.
Ta asina cu E.Biemans ta wordo representa pa mr. Oomen, Franklin Abath pa mr. Maldonado, Edgar Werleman y Ninosca Nuñez pa mr. Oomen, Oslin Sevinger pa mr. Kock y mr. Illes, Reina Richardson pa mr. Arendsz Marchena, Maria Arends pa mr. Canwood, Pieter Susebeek pa mr. Kock y mr. Illes, Carlo Mansur, Curt Douglas Harms, Frederic Every pa mr. Carlo, Mary Winterdaal Met Chomff pa mr. Emerencia, de Hoogd.
Mr. Oomen pa Biemans a bisa cu den su peticion e por a compronde cu Fiscal no tin nada contra pa scucha e sospechosonan Abath y Sevinger como testigo. Fiscal no a bisa nada di scucha Winterdaal y un otro. Pa loke ta Nuñez y Werleman el a bisa cu e kier pa inclui declaracion Sevinger pa cu e asunto di cumpramento di tereno.
Por a ripara cu mayoria di e abogadonan a pidi pa inclui e declaracion di Sevinger y documentonan cu Sevinger a haci na Polis. E abogadonan ta haya cu esaki no ta pa mustra kendenan lo ta culpabel sino pa demostra cu esaki ta un forma di traha cu pa hopi aña ta andando y como tal no tin nada malo a sosode manera Fiscal ta acusa.
Mr. Maldonado a bisa kier scucha Sevinger y Biemans como testigo. Tambe el a pidi pa scucha un persona cu segun e abogado ta importante pa su cliente.
Mr. Carlo, mr. Canwood, mr. Arendsz Marchena tambe a presenta lista di testigo pero mayoria ta mesun personanan nan kier scucha.
Mr. D.Kock a remarca cu Fiscal kier caba mas pronto posibel cu e caso mientras cu ainda no a haya documentonan cu a wordo confisca di Sevinger y Susebeek. Esakinan segun e abogado ta necesario pa por prepara e caso. El a pidi Hues pa ordena Fiscal pa debolbe e administracion confisca di su clientenan. Tambe el a menciona personann cu e kier scucha entre otro di Orco Bank Curacao.
A keda palabra cu otro siman Diamars, Fiscal lo duna su reaccion y Diaranzon Hues lo duna su punto di bista.