Ayera 14 di maart 2022 a tuma lugar den sala di Parlamento un reunion publico caminda a trata e aspecto di criminalidad y problemanan social bou di nos hobennan cu Minister Tjon.
Mi ta contento di por a scucha e fraccion mas grandi di oposicion awe porfin accepta e realidad cu ta nan a ocaciona e crisis social. Cu tur e consecuencianan cu nan a subraya y menciona, un tras di otro, durante prome tanda di e reunion. Consecuencianan manera criminalidad, drop outs, y desempleo. Algo cu di aña 2017 Gabinete Wever-Croes a bin ta menciona y debidamente a y ta dunando e atencion. Mester bisa cu no solamente mencionando plan bo ta cla, pasobra eseynan tabatin y tin hopi, pero door di atende e problematica cu prioridad y apuntando e fondonan necesario pa realisa diferente proyecto/programa y maneho asina berdaderamente bo ta crea solucion.
Hopi a wordo bisa pero tambe hopi a keda haci door di Gabinete Wever-Croes, contrario na loke oposicion kier a insinua ora cu e reunion aki a inicia. Sigur pa loke ta trata Sociaal Crisis Plan nos di Parlamento structuralmente a keda informa mediante raportahe y presentacionnan.
Scuchando tur e preguntanan haci pa oposicion mi no por bisa nada otro cu e ta refleha un biaha mas cu nan gusta scucha djei lubida, na mes momento e ta subraya e realidad cu nan ta haya raportahe y no ta lesa, e ta accentua tambe claramente cu nan no a y ta atende reunionnan di diferente comision fiho y sigur ta hopi obvio cu nan no a participa na e 13 hoorzittingnan relaciona cu abuso di mucha cu a tuma lugar di oktober 2020 te cu mei 2021 den sala di parlamento. Hoorzittingen cu entre otro SPD, Slachtofferhulp, Fundacion Guiami, Jeugd en zeden politie, Openbare Ministerie, Veiligheidshuis, Orde van Advocaten, SOZA, Reclassering y asina mi por sigui menciona.
Durante prome tanda a scucha pregunta over entre otro Sociaal Crisis Plan, introduccion di straf minimo, abuso di mucha y problematicanan den e keten social. Tur ta problema y of topiconan cu nos a bin ta atende debidamente y tin contestacion caba riba mayoria di e preguntanan haci awe. Oposicion mas bien kier a uza e oportunidad di e reunionnan aki pa ta e mensahero di mal noticia lubidando cu e crisis social aki ta algo cu a keda hereda di Gabinete Mike Eman I y II. Net AVP kier awe cuestiona y enfatisa gravedad di e crisis social ocaciona door di nan propio negligencia y falta di atencion debido y di no dune prioridad.
Como pais, como pueblo nos mester realisa cu ta bay rekeri mas tempo, mas placa y mas hende pa por atende cu e crisis social. Cual tur ta elementonan hopi schaars. Nos no mester lubida nos situacion, nos no por lubida e mega debe cu AVP a ocaciona y e situacion financiero desastroso cu nan a laga atras cu sigur a keda empeora door di e pandemia cu a bati na nos porta apenas den e di 3 aña di Gabinete Wever-Croes. Na mes momento nos mester realisa cu resultado di maneho y inversion den asuntonan social ta tuma tempo pa cristalisa.
Pa conclui mi kier felicita Minister Tjon pa a contesta tur pregunta a base di cifras y hechos. Ademas el a elabora riba tur e proyectonan na caminda pa locual ta trata prevencion di criminalidad bou di nos hobennan y mas importante, esaki ta bisto den presupuesto 2022. Pues no ta solamente proyectonan y ideanan bunita, pero tambe fondo necesario pa por cuminsa ehecuta esakinan. Cu e contestanan y informacion amplio brinda den e reunion publico aki mi ta convenci cu e problemanan social lo sigui haya e atencion necesario y oposicion den su totalidad lo sa di aproba e presupuesto cu lo mester percura pa haci tur esakinan posibel.