ORANJESTAD – Siman pasa Minister Endy Croes conhuntamente cu Prome Minister Evelyn Wever – Croes y Minister Geoffrey Wever a reuni cu e Parlamentarionan di Eerste Kamer di Hulanda kendenan tabata di bishita na Aruba den cuadro di reunion anual. E Parlamentarionan a bishita diferente isla y Aruba pa haya un miho bista di kico ta sosodiendo. Durante e reunion a trata diferente topiconan manera entre otro e situacion financiero di Aruba, COHO y RAFT. Banda di e temanan aki a trata tambe combatimento di corupcion, importancia di integridad pa Gobierno. E tema di crisis di Venezuela y e impacto cu e crisis aki tin riba Aruba tambe a bin dilanti. particularmente e situacion di cantidad di personanan cu a pidi asilo, e cantidad di personanan cu ta na Aruba sin documentacion, e impacto cu esey tin riba nos infrastructura, nos enseñansa, cuido di salud, y e ayudo di Hulanda cu Aruba a ricibi. Minister Endy Croes a expresa e tabata un bon reunion y ta contento cu Parlamentarionan tabata asina receptivo pa scucha unda a intercambia diferente idea.
