ORANJESTAD: Diasabra ultimo Minister di Enseñansa y Deporte a sali pa Hulanda pa un bishita di trabou durante e siman di 7 pa 11 di maart. Riba invitacion di Minister di Enseñansa di Hulanda sr. Robbert Dijkgraff lo atende e ‘vierlanden overleg’ riba tereno di Enseñansa y Cultura. E reunion inicialmente mester a tuma luga na Boneiro pero den cuadro di formacion di Gobierno nobo di Hulanda Minister Dijkgraff a haci un invitacion pa e ministernan di Enseñansa di Curaçao, Sint Maarten y Aruba pa tene e ‘vierlanden overleg’ na Hulanda. Unda lo trata un agenda di 17 punto di cual mayoria ta riba e tereno di Enseñansa. E Mandatario a sigui bisa nos ta bay cu mente habri pa busca cooperacion den e momentonan dificil cu nos ta pa asina yega na e miho entendimento y cu enseñansa na final di dia por ne miho forma posibel brinda oportunidad na henter nos comunidad cu acceso na enseñansa. Banda di esaki nos tin un agenda cu reunion cu diferente ‘stakeholders’ hopi importante na Hulanda. Nos lo bishita scolnan tecnico cu por sostene nos pa cu OAA cu lo cuminsa bek na augustus proximo. Pues ta bay tin un serie di reunionnan cu Departemento di Enseñansa di Hulanda banda di reunionnan di e ‘vierlanden overleg’ y ohala nos por bin bek cu resultadonan fructifero cu por contribui tambe na enseñansa den su totalidad akinan na Aruba.