Recientemente Minister Rocco Tjon a anuncia cu Gobierno lo percura pa Aruba haya un medico forensico. Algo cu segun Parlamentario Tromp-Lee durante diferente reunion cu stakeholders riba e topico di abuso di mucha a keda indica como un necesidad urgente banda di un medico di confiansa. Pesey mes e ta aplaudi cu Gobierno a busca un solucion mirando cu tabata hopi dificil pa haya uno.
Importancia di un medico forensico
E medico forensico su tarea principal ta pa assisti den investigacion forensico di abuso sexual y violencia relacional severo. Esaki lo fortifica e parti di investigacion penal door di genera e pruebanan necesario di e acto cometi y cu ta sumamente importante pa forma e caso dilanti huez. Esaki lo conduci na su turno na castigonan mas severo y cu berdaderamente ta refleha e gravedad di e delito cometi. Mirando cu ta mediante di un studieopdracht lo bay logra yena e funcion aki, lo rekeri di 2 aña y mei pa e bira un echo. Mientrastanto Gobierno lo percura pa un solucion temporal pa por surpasa e 2 aña y mei aki.
A aumenta castigo maximo na juni 2020
Na juni 2020 Parlamento a aumenta e castigo maximo cu por keda duna ora un mucha of un menor keda abusa sexualmente, ora un persona homber of muher, bieu of jong keda abusa, viola, maltrata te cu keda mata. En total a aumenta e castigo maximo den 27 articulo di nos codigo penal. Delitonan manera violacion, sexo indesea cu un mucha bou di 12 aña, casonan di maltrato premedita cu morto como consecuencia y maltrato severo premedita tur a subi na un castigo maximo di 15 aña. Ta trata aumento di 3 pa 6 aña di e castigo maximo cu anteriormente tabata valido. Door di e cambionan aki a trece cambio den e castigo maximo di doodslag y maltrato severo premedita cu morto como consecuencia, di 15 pa 24 aña.
E cambionan aki a pone cu Aruba a yega na e nivel di castigo maximo cu ta keda duna pa e delitonan aki den Reino.
Otro cambio cu a tuma lugar ta e ‘verjaringstermijn’ di diferente delito, esta cu esaki a keda kita pa diferente delito. Esaki a haci posibel pa un victima semper por entrega keho, aunke hopi tempo a pasa. Asina e abusado por keda investiga y husga. Cu otro palabra e victima no ta perde su derecho pa busca husticia. Esaki sigur ta un cambio cu tabata necesario.
Mas proyecto realisa pa Gobierno riba e tereno aki
Diferente proyecto cu ta cay bou Sociaal Crisisplan of separa manera
Meldcode
Signs of safety
Codigo di proteccion
Certificacion di tur zeden rechercheur y psicologonan cu ta traha riba e tereno aki
A percura pa un studio verhoor ruimte cu ta cumpli cu norma y exigencianan
Realisacion di e proyecto Family Justice Center cu ta un proyecto nobo na unda instancianan hudicial y instancianan di ayudo social lo traha mas hopi posibel bou di un solo dak y den algun caso hopi mas cerca di otro. Hunto lo duna servicio mas completo posibel na victimanan di abuso sexual y violencia relacional fisico severo.
A percura pa diferente curso y upgrading di nos recurso humano
Y asina nos por sigui menciona, Tromp-Lee ta remarca.
Parlamentario Tromp-Lee ta termina gradiciendo gobierno pa tur e proyectonan realisa y esnan cu ta andando riba e tereno aki y ta subraya na mes momento pa Pueblo ta consciente cu si di berdad nos kier stop cu abuso y maltrato esaki ta implica cambio di mentalidad di NOS como sociedad, fortificacion di e fundeshi di nos famianan, amplia y haci obligatorio formacion via curiculo den enseñansa di nos mucha y hobennan riba salud sexual y e aspectonan di abuso, violacion y maltrato. A yega ora pa cuminsa educa nos muchanan hopi mas habri y dirigi tocante e topiconan aki y haci nan ‘bespreekbaar’ for di chikito na cas, na scol y den comunidad. Traha na prevencion ta crucial y necesario.