Home Politics Minister Rocco Tjon: A HAYA RECORIDO DI DIRECTIVA DI FUNDACION PA...

Minister Rocco Tjon: A HAYA RECORIDO DI DIRECTIVA DI FUNDACION PA MANEHO DI ADICCION DI ARUBA (FMAA) Y NAN FACILIDADNAN Y A HAYA PRESENTACION AMPLIO DI PROYECTONAN NOBO NA CAMINDA

SHARE

ORANJESTAD – Dialuna mainta, Minister di Husticia y Asuntonan Social Sr. Rocco Tjon,  a haya un recorido amplio for di e directiva di FMAA y a bishita tur nan facilidadnan situa na San Nicolas y Seroe Colorado. A bishita tambe Centro di Motivacion como tambe e Consultorio pa Asuntonan di Adiccion (CAA) na San Nicolas y Meiveld. A termina e recorido na Dakota, cual ta e sitio caminda ta bay construi un edificio nobo pa ubica FMAA y Sociaal Psychiatrische Dienst (SPD) hunto, pa reduci gasto, pero tambe pa percura cu procesonan por cana miho pa asina brinda un miho calidad di servicio na e clientenan. 

 

Segun Minister Tjon a splica, nan ta dialogando cu tur e “stakeholders” pa algun tempo caba, y aña pasa a firma diferente protocolnan cu ta percura pa tur instancia traha mas serca di otro, manera: FMAA, SPD, Huisartsen Vereniging Aruba (HAVA) y Respaldo, pa asina haci e cuido, uno mas accesibel y na mes momento precura pa baha gasto di tur e procesonan. Dentro di poco lo cuminsa cu e construccion di e edificio nobo designa pa FMAA y SPD, ta stipula cu den luna di Maart lo pone e prome piedra, y lo finalisa e proyecto aki e aña aki. Un centro multi-funcional, caminda e personal di FMAA y SPD lo bay brinda e ayudo necesario na tur esnan cu tin mester di esaki, y lo bay toca e parti di salud mental tambe. Pues, ta trata di un centro mucho mas accesibel cu por brinda mucho mas informacion como tambe crea e conscientisacion necesario y preventivo na tur esnan cu tin mester di esaki. 

 

Un punto hopi importante tambe di e proyecto aki ta cu e ta bay crea mas espacio na nan localidad na Meiveld, pa asina nan por atende hopi mas cu e adictonan ambulante. Ta trata aki di un proyecto cu lo bira un realidad pa medio di fondonan cu ta wordo poni liber, a traves di restructuracion di diferente procesonan. Actualmente, FMAA ta haya subsidio di Gobierno, di cual e directiva actual a haci un tremendo trabou pa sanea e situacion financiero di e fundacion aki, cual nan a bin ta haci pa algun aña caba, di cual e situacion financiero di FMAA, na e momentonan aki, ta uno solido. A traves di e subsidio cu FMAA ta haya, nan lo financia henter e proyecto aki, y pa e motibo ey, Ministerio di Husticia y Asuntonan Social ta den dialogo cu nan constantemente, pa asina brindanan e aporte necesario, pa esaki por bira un realidad. 

 

Por ultimo, e Mandatario a splica cu inversionnan asina, a traves di restructuracion di procesonan, cual ta percura cu fondonan y subsidionan ta wordo miho aloca, ta haci cu e tipo di proyectonan aki por bira un realidad. Na mes momento tambe ta wak a termino largo, mirando cu bo ta brinda un cuido mucho mas accesibel, cual ta percura pa e gastonan riba termino largo ta mucho mas abou, pues na final di dia, e proyecto aki lo paga su mes bek.