Home Politics Parlamentario Marco Berlis (MEP): Si di berdad bo tin Aruba su...

Parlamentario Marco Berlis (MEP): Si di berdad bo tin Aruba su bienestar na pecho bo lo a vota PRO pa mocion di RWZI

SHARE

Riba diabierna mainta februari 4, 2022 e comision fiho di Infrastructura a organisa un mainta di informacion na RWZI pa Parlamento. E punto di encuentro tabata na e planta di Bubali, na unda e Parlamentarionan a haya un rondleiding di e planta y e den nan oficinanan. Nos por a gosa un bon splicacion di cada paso, machin, tanki, e curason di e planta, e inversionnan haci y e cambionan cu ta tumando lugar. Tambe a lansa diferente pregunta y e expertonan a duna splicacion amplio y bon elabora riba tur. Expertonan di e planta a mustra nos e tecnologia anticua cu e planta aki ta usando, ya no ta compatibel mas cu e ekipo nobo cu ta cumprando pa mehora e planta. Inversionnan lo continua pa duna e planta tur e recursonan posibel den e tempo aki, pa asina e ta prepara pa ora e planta nobo wordo construi.

 

Mester menciona cu e miembro di fraccion di AVP, sr. Ryçond Santos Dos Nascimento cu a critica nos rondleiding y mainta di informacion anterior na WEB, y a yame pa buitendag, tabata presente e biaha aki. Mi a keda bastante sorprendi pa wak su persona bin e rondleiding aki. Mi tabata sorprendi ya cu ora mi a tuma e iniciativa di presenta e un solucion den e forma di un mocion den Parlamento, pa urgi gobierno pa traha un meerjarenplan structura di mantencion di e plantanan y aloca fondo pa esakinan den begroting y tambe pa un planta nobo, e y henter su fraccion di AVP a vota encontra. Pesey, despues di a trata di boycotia e renobacion y ayudo na e planta di RWZI, mi no sa cu ki intencion e miembro di Parlamento aki encuestion a bin e mainta informativo aki. Si di berdad bo tabata asina preocupa cu e calidad di awa y nos beachnan, bo lo a vota PRO pa e instalacionan di RWZI wordo manteni, upgraded y un instalacion nobo na Bubali por wordo traha. Pero bo a vota CONTRA!

 

Dimes miembronan di Parlamento di coalicion tabata tey, y sra Gunn di fraccion di MAS tambe tabata tey. Ma keda sorprendi un biaha mas, pasobra el a yega trempan. Mi asombro cu ne, tabata de hecho cu ma kere cu e ta un persona serio. Pasobra apesar cu e y su lider sra. Lopez-Tromp tabata informa di e condicion y crisis cu RWZI ta den dje, su persona y su lider a vota encontra di salba nos plantanan di RWZI. E ta e actitud aki cu mi ta haya lamentabel y sigur condenabel. Con por hustifica e accion anti-Aruba asina aki? Y asina mes partidonan chikito den oposicion cu nunca a saca un asiento, nunca ta menciona nada di esaki den prensa. Alcontrario, nan ta para solidario contra di e a salbacion y renobacion di nos plantanan di RWZI. Ta bisto cu ora bo critica tur otro cos pero ta tene man cu esnan cu ta vota contra Aruba, bo tambe ta participa den e criminalidad aki. 

 

Nos no por ta selectivo den nos critica ora ta toca nos pais Aruba. Si di berad nos ta stima e baranca aki, nos ta yama bon loke ta bon y nos ta vota encontra di loke no ta cumbini nos pais. Pero pa bisa tur cos ta malo, inventa storia, tene man cu esnan no tin Aruba na pecho, hunga un politica djis pa yega na poder, ta un practica peligroso y cu pueblo sigur lo sa di husga.