ORANJESTAD – Siman pasa “Nationale Postcode Loterij” di Hulanda a indica cu e subsidio cu UNICEF NL a haci peticion riba dje, a keda aproba. UNICEF NL lo traha den colaboracion cu e Ministerionan di Aruba y Curacao, pa asina fortalece e sistema di proteccion di mucha, specialmente den e temponan aki, despues cu e impacto social economico a haci e reto aki aun mas grandi, como tal e ta di suma importancia pa duna sosten na e islanan aki.
Ta trata di 2.3 miyon di Euro, cu lo ta destina pa algun proyecto cu ya ta delinea den liña grandi, tanto na Aruba como Curacao den colaboracion y palabracion cu gobiernonan di Aruba y Hulanda. Esaki lo ta hunto cu e profesionalnan di ambos isla, pa yuda cu e proteccion di nos muchanan y structuralmente mehora y optimalisa e sistema aki. E meta principal di esaki ta pa e muchanan por lanta y crece den un ambiente di siguridad, sin violencia y asina brindanan e oportunidad pa desaroya optimalmente y laga nan talentonan desplega.
E temanan y e metanan di e peticion di NPL ta traha a base di e “Padlet-Needs Assessment”, pues segun diferente combersacionnan cu algun profesional a duna como prioridad aña pasa. Awo lo inicia e parti di planificacion di actividadnan pa Aruba, conhuntamente cu e profesionalnan pa e periodo di 2022 – 2024, tur segun locual NPL como tambe Europese Commissie ya aproba. Tur esakinan, ta den un cuadro hopi estricto y supervisa a base di metanan concreto y UNICEF NL lo duna sosten tecnico den henter e proceso.
E cuater pilarnan cu lo bay enfoca riba dje y cu lo bay duna e contenido local ta:
Deteccion Trempan / Codigo di Proteccion
Criansa positivo
Participacion Hubenil
Stimula colaboracion interinstitucional pa prevencion di violencia contra mucha.
Pa Aruba esaki sigur ta un tremendo noticia y e reunionnan di “brainstorming” cu e diferente profesionalnan lo inicia proximamente pa crea un tremendo colaboracion pa cu e necesidadnan di e muchanan di Aruba.