Paradera – Diabierna anochi den careda di 8’or pasa un caso di hit and run a sosode poco pariba di rotonde di Paradera.
Un señora na stuur di su Toyota Yaris a bira e victima di un chauffeur sinberguensa.
E señora chauffeur a para debi cu un auto su dilanti a bay bira na su man robes. Un suv maneha pa un homber no tawata pone atencion ariba caminda y ta dal duro patras di e Yaris cu un famia den dje.
Un testigo cu a mira locual a sosode a conta con lihe e chauffeur den SUV a paga su luznan di auto reverse y cu velocidad halto bay direccion di rotonde Paradera unda a perde di bista.
Pero, e señora a reacciona mesora y ta logra mira e plachi number aunke e chauffeur masculino a paga su luznan di auto.
Durante e impacto fuerte un hobencito a dal su boca basta duro y e tawata herida. Por a mira cu e hobencito su boca tawata sangra y e tawata hopi spanta.
Den algun minuut polis di trafico a presenta y a pidi pa un ambulance pa e mucha homber. Na yegada Paramediconan a atende cu e hobencito.
Na e sitio nos a compronde cu e plachi number ariba e suv no ta cuadra cu e auto.
Polis lo acerca e adres na unda e plachi number ta registra, pues autoridad lo yega na e persona responsabel.
Di e manera aki diariamente Aruba su polisnan di trafico ta hayanan cu casonan di hit and run.
Den e caso aki un hobencito a resulta herida na su boca, e por tawata mas serio tambe y kiko e ora ?
