Home Politics 142 persona a drenta gobierno den 2021 y 53 ta continua den...

142 persona a drenta gobierno den 2021 y 53 ta continua den social crisis plan

SHARE

 

Diaranson den oranan laat di atardi fraccionan di coalicion a vota pro e presupuesto supletorio 2021 di Aruba c uta confirma cu 142 persona a drenta den vaste dienst di gobierno e aña aki. Parlamentaria mr. Gerlien Croes a motiva su decisión pa vota contra e hecho aki,  y hunto cu su coleganan di fraccion di AVP y  di e otro fraccionan den oposición, nan a desaproba e presupuesto supletorio 2021.

Ta cinico cu mientras trahadornan di sector publico ta lucha pa nan 12.6% y cu CAFT ta keda pidi gobierno repetitivamente pa draai back e decisión di 8 miyon na vacatura nobo pa 2021, toch gobierno ta dicidi di nombra en total 142 persona e aña aki. 

Maske gobierno kier purba argumenta esaki bisando cu ta pa e departamentonan esencial so, entrenan KPA, ARUMIL, DUOANE,  oposicion tin tur indicacion di otro nombramentonan cu a y ta tumando lugar den otro departamentonan. Landsbesluitnan ta sali por ehempel pa trahadornan na DVG pa un departamento nobo cu a ser crea di zorgtransport, pa asina minister encarga cu salubridad por acomoda mayoría di su coordinador y campañador  ariba payroll fiho di gobierno, entre nan den funccion di chauffeur.

Sin mas, no ta mucho dia atras cu Minister di asuntonan social a bin parlamento cu e peticion di extende contract di 53 trahador mas bou di e capa di e social crisis plan. Den e cantidad aki tin algun ta den forma di duna servicio na gobierno, (dienstverleningsovereenkomst) y ningun hende no tin bista si esunan cu tin e contrato di duna servicio ta gana 5 mil, 10 mil of 20 mil pa luna. Casi 200 persona adicional den gobierno sin tin un bista concreto ainda ariba cuanto mas lo wordo tuma na trabou directamente den e bureaunan di ministersnan. Minister Wever di economía ya a duna di conoce cu e posibilidad ta grandi cu e lo mester busca mas hende pa drenta den dienst.

E reformanan structural cu gobierno di integridad a papia di dje den aparato gubernamental pa cu gastonan di personal lo pasa pa olvido,  gobierno a anuncia durante e reunion cu e no lo ehecuta e plan di BVP (Beleid hervormingsplan) mas. Segun minister di finanzas, lo bai traha ariba otro proposicion pa Hulanda, cu e gastonan di personal total lo mester ta 10% di e GDP di e país.

Despues di un siman largo di reunion di parlamento,  promer cu sera e aña 2021, pueblo a keda sin por wak e contract di Eagle LNG firma pa 20 aña y por a tuma nota cu enberdad gobierno ta ehecutando e Masterplan cu nan a presenta 2020 cu ta titula “Reposicionando e Rumbo di nos Pais”, solamente cu pueblo ta realisa awe cu e Rumbo no ta necesariamente pa esun mihor.