ORANJESTAD – Awe mainta, durante un ceremonia ameno, directiva di Fundacion Enseñanza pa Aruba (FEPA) a haci entrega di certificado na 13 preso cu a sigui diferente curso. E cursonan aki ta inclui manicure basico y alfabetisacion (Deelcertificaat Hulandes). E meta di e programa aki ta parti di e re-integracion di presonan den comunidad, pa asina nan por cambia nan habitonan y transforma nan conocemento y engrandece nan habilidadnan pa asina por haya un empleo den comunidad.
FEPA tawata tin como intencion, pa cuminsa cu e proyecto aki brindando varios curso, sinembargo pa motibo di e situacion complica debi na e tema di e pandemia, a logra inicia e proyecto cu solamente dos curso pa e momentonan aki. E cursonan tin un duracion di dies siman, caminda e participantenan ta haya e lesnan necesario. Tin di bisa cu e meta final di e curso di alfabetisacion, ta pa ora nan caba cu e curso aki, nan por continua cu un estudio basico, sea MAVO of MBO-1. Cursonan a wordo organisa y ehecuta door di FEPA, cu e intencion di amplia esaki den aña 2022, cu ideanan di kier cuminsa cu cursonan di MAVO y MBO-1. Ultimamente, e obhetivo ta pa por yega na transforma KIA di un “bewaarplaats”, pa un berdadero insitituto coreccional.
E programa aki lo yuda e presonan den e proceso di re-integracion den comunidad y asina percura pa un miho calidad di bida pa e persona. Di e forma aki tambe ta duna e persona un miho oportunidad di logra haci su transicion exitosamente, asina evitando pa bolbe cay den man di husticia. Esaki tambe ta yuda pa rebaha e casonan di “repeat offenders” cu sigur ta un di e metanan pa Ministerio di Husticia y Asuntonan Social.
Adicionalmente, FEPA a aserca Minister Tjon cu e idea pa e proyecto piloto ”Caminda pa Trabou”, unda lo ofrece un serie di diferente programa educativo, pa diferente grupo clave pa re-intregracion, entre otro; “bijstand trekkers”, ex adictonan, hobennan di stichting reclassering, y esnan desemplea. Por medio di e cursonan aki, kier brinda un sosten na e personanan aki y asina duna un man na e proceso di re-integracion pa asina nan por bolbe forma parti di nos comunidad.