Diamars atardi e Dash di Wardacosta a detecta un boto durante di patruya cu a bin for di zuid y tawata nabega den e awanan entre Aruba cu Corsow. E diferente sistemanan di radar di KPA y RCC a sigui e boto sospechoso aki mirando su posicion.
Na momento cu e boto Thanos a drenta e awanan territorial di Aruba, KPA a notifica Wardacosta. Panter y un Metal Shark a drenta den accion mesora y a bai tras di e boto aki pa controla e boto. Na momento cu a yega serka di e boto a start un persecushon riba lama. E Metal Shark di Wardacosta a logra intercepta e boto aki serka di Aruba cu dos persona abordo. Helikopter di polis tambe tawata den accion y a controla e costanan pa posibel iregularidad.
E boto aki cu su capitan y su ayudante a wordo treci na e pier di Barcadera bou di ordo di fiscal y escolta pa Metal Shark y helikopter di polis pa mas investigacion. Durante di controlnan na bordo no a haya nada irregular riba e boto. Pa e motibo aki despues di investigacion e boto a sigi su rumbo pa su destino.