Home Politics Brindando proteccion contra tur sort’i abuso di mucha na Aruba: 17 Instancia...

Brindando proteccion contra tur sort’i abuso di mucha na Aruba: 17 Instancia Social y 119 Centro di Cuido di Mucha lo traha cu Codigo di Proteccion

SHARE

Aruba su profesionalnan ta den pleno e proceso di ehecucion di implementacion di e Codigo Proteccion contra (sospecho di) abuso di mucha, p’asina por cumpli cu e Tratado Internacional di e Derechonan di Mucha, Articulo 19: Proteccion contra abuso di mucha. Unda ta prohibi pa abusa y maltrata un mucha (0-18 aña). E mayornan y otro persona cu ta cuida mucha, mester tin suficiente atencion pa e muchanan. Ta prohibi pa neglisha mucha. Gobierno mester duna informacion, cu abuso di mucha ta prohibi y na momento cu abusa di un mucha, e mucha aki mester haya yudansa mesora.

Lider di Proyecto, sr. Efraim Suurendonk, ta satisfecho pa comparti cu Codigo di Proteccion ta den fase di implementacion y ehecucion den e sector social tambe, unda cu tin e siguiente 17 instancianan social involucra: CEDEHM, Stichting Kindertehuis Imeldahof, Stichting Casa Cuna, Fundacion Contra Violencia Relacional, Fundacion Pa Nos Muchanan, Fundacion Respetami, Tienda di Educacion, Departamento di Asunto Social (4 subafdeling), Fundacion Famia Planea, Bureau Traimerdia, Stichting Sonrisa, YMCA Aruba, Stichting Verstandelijke Gehandicapten Aruba, FAVI, Telefon Pa Hubentud, Fundacion Autismo Aruba, AHTA.
Bou di e sector social tambe nos ta haya e 119 Centronan di Cuido di Mucha (voor-en naschoolse opvang), di cual 74 Centro di Cuido di Mucha a haya tur informacion mediante varios di estudio completamente dirigi riba e grupo meta aki, cu ta uno sumamente crucial tambe. Esaki specialmente mirando cu e muchanan ta pasa gran parti di nan dia na un centro y tin como 35.9% di nos muchanan 0- 3 aña (CBS 2020), cu ta bishita un centro di cuido.

Durante 2020 y 2021 tabatin varios momento unda cu a sinta na mesa hunto, pa dialoga y tambe bin cu protocolnan di colaboracion entre e diferente instancianan concerni, pa asina por brinda e ayudo necesario mas liher y eficiente posibel. Varios di e instancianan ya a crea un plan di implementacion di Codigo, cual lo fungi como un maneho diario na momento cu tin (sospecho di) abuso di mucha. Esaki ta un base solido di colaboracion y compromiso cu e Articulo 19 di Derecho di Mucha, unda cu sector social ta comprometi pa sigui ehecuta Codigo di Proteccion, p’asina brinda nos muchanan un oportunidad pa crece den un ambiente feliz y protega. Pa lider di proyecto, Codigo di Proteccion den sector social ta di sumo importancia, ya cu a base di e protocolnan estableci, e instancianan lo traha hunto, unda tur profesional den e sectornan lo aplica e mesun forma di traha, treciendo asina un structura nacional den cuido y proteccion di nos muchanan. Por ultimo como lider di sector di Social, Efraim Suurendonk ta desea di extende un palabra di pabien na cada un di nos mucha- y hobennan di Aruba riba nan dia di Derecho di Mucha.