Avenida Nelson O.Oduber – Diadomingo algo pasa di mey anochi un auto Mitsubishi Outlander a perde control ariba e avenida aki.
Informacionnan ricibi tawata papia cu un auto lo a bay dal contra un baranca. Momento cu polis a yega e la topa un Mitsubishi Outlander, pero esaki tawata pega contra un mata.
Ta mustra cu e chauffeur bayendo nort y poco mas pazuid di e crusada di Palm Beach a perde control. Den e maniobra e la ranca borchi di trafico y bay termina contra un mata.
Polis a constata cu e chauffeur tawata ok, pero asina mes pa siguridad a pidi pa un ambulance.
Paramediconan na yega a trata e cabayero na e sitio.
Famia di e chauffeur tambe a yega un rato despues pa pone nan mes na altura di locual a sosode.
Durante cu nos tawata na e sitio y momento cu nos a cana ariba e caminda por a nota cu e caminda ta slip.
Algun rato prome awa a jobe un poco y esaki lo por a causa cu e auto a slip.
