Home Politics Parlamentario Alvin Molina (MEP): Simposio exitoso: Ta importante pa nos pone...

Parlamentario Alvin Molina (MEP): Simposio exitoso: Ta importante pa nos pone atencion na e otro banda di medaya

SHARE

Diabierna ultimo mi a presencia e simposio ‘De andere kant van de Medaille’ organisa pa Stichting Reclassering en Jeugsbescherming Aruba. Pa prome biaha den 60 aña a organisa un simposio unda e enfoke tabata riba e ofensor di delitonan sexual. Profesionalnan den e veld di husticia y asuntonan social di diferente departamento y instancia na Aruba a participa pa haya informacion di e programanan cu Stichting Reclassering Aruba, Hulanda y Caribisch Nederland ta ofrece. 

Mi experencia na e simposio; un di e bandanan di e medaya ta e victima den un caso penal, pero e simposio aki a enfoka riba e persona cu ta comete e acto. Loke a bin dilanti ta algo cu semper mi a kere den dje ta cu e parti represivo por tin un efecto preventivo. Si ful e veld di husticia, for di polis te reclassering, traha na un manera cu ora e persona cu comete e acto sali bek di KIA e por re-integra na un manera cu comunidad ta wordo proteha contra e acto cu e persona aki ta capas di haci.

 

Nos por discuti si un persona mester haya un di dos oportunidad despues di a comete un acto grave. Pero un cos cu nos tur ta di acuerdo cun’e ta cu comunidad merece un di dos oportunidad ora e persona aki sali bek di KIA. E persona aki un dia lo sali y drenta bek den comunidad, nos como comunidad mester ta prepara pa ricibi e persona aki. Y e persona mester wordo prepara tambe pa drenta comunidad bek na un manera productivo, un manera social, un manera cu e no ta forma un peliger mas pa nos tur den comunidad. 

 

Mi ta gradici Stichting Reclassering en Jeugdbescherming pa e invitacion y recepcion. Alabes felicita e ekipo pa un dia yena cu informacion.