Diamars 9 di November, a tuma luga den Parlamento e reunion publico pa trata e tema di AZV. Minister di Salubridad Señor Dangui Oduber tawata e minister encarga pa contesta y duna informacionnan riba e tema aki. Prome Minister Señora Evelyn Wever-Croes, a presenta tambe na e reunion publico pa contesta preguntanan cu a wordo dirigi na dje pa miembronan di Parlamento. Prome Minister a cuminsa cu su contestanan recordando Parlamento un biaha mas tur loke a pasa pa awe Aruba ta den e situacion aki pa loke ta trata cortamento den gasto den cuido medico.
Si nos bay bek den tempo, 13 di maart 2020, na e momento cu Aruba a haya e dos prome casonan di Covid, un di e puntonan di mas dificil tawata e insiguridad di loke cu ta bay pasa.
Desicionnan mester a wordo tuma. A cera fronteranan cortando den e ader economico mas importante di nos pais. Mercado financiero internacional a dal cera riba Aruba tambe. Pa por sobrevivi, nos tawata tin mester di likides. Gobierno a premira y calcula cu debi na e impacto di e pandemia, e necesidad financiero di likides lo ta minimo 1000 miyon florin. No tawata tin otro caminda pa presta e placa solamente Hulanda. Prome Minister a enfatisa, pa prome biaha den historia di nos pais, Gobierno a bati na porta di Hulanda pa pidi yudansa. Hulanda tawata dispuesto pa duna e sosten di likedes cu te cu awe ta suma e cantidad di 900 miyon florin.
Mescos cu cualkier pestamo di cualkier cantidad di placa, esaki tambe a bin cu condicionnan. Esaki a bin cu hopi condicion te hasta pa pone nos sinti cu nos autonomia a wordo poni bou presion. Un di e condicionnan cu Hulanda a impone tawata riba gastonan di cuido. Y riba un diaranson, Hulanda a manda bisa, cu si pa e siguiente diabierna, Aruba kier e 130 miyon florin pa e prome tranche, Aruba lo mester bay di acuerdo pa corta 5 miyon den AZV prome cu 1 di juni, si no Aruba no lo haña e placa pa mei y juni.
“Na e momento aki, no tawata tin espacio pa dialogo, debati, cuestiona ni negocia. Gobierno ta lomba contra muraya. Nos ta na suela benta. Nos a pidi 130 miyon, y Hulanda a bisa cu nos mester corta 5 miyon”, Prome Minister a remarca.
Ora cu Gobierno a haya aprobacion di e sosten di likides, e siman despues, Gobierno a cuminsa dialoga con lo por corta 5 miyon den cuido mientras cu Minister di Salubridad Dangui Oduber ya caba tawata trahando riba plannan pa reduci gastonan cuido. CAFT den varios di nan rapportnan a menciona cu mester reduci gasto den cuido.
Sinembargo den apenas algun dia, Hulanda a manda por escrito e decision di Conseho di Minister di Reino indicando cu prome cu 1 di juni, Gobierno mester indica con ta bay corta 5 miyon den cuido pa luna. Aki e texto ‘pa luna’ a bin acerca.
“Den e carta di CAFT, e prome carta, CAFT a indica cu Gobierno mester corta 5 miyon florin prome cu un di juni. Y algun dia despues, Goiberno ta ricibi un carta di BZK bisando cu mester corta 5 miyon florin den cuido pa luna prome cu un di juni. Aki cos a bay fout. Na mi parecer, el a bay fout aya na Hulanda”, Prome Minister a duna di conoce.
Prome Minister a accentua cu ni CAFT ni BZK a aclarea e fout aki cu a wordo cometi di nan banda. Pero, Gobierno si a keda sinta cu e problema. Aruba tawata tin mester di e placa, e sosten di likides di Hulanda. Gobierno no tawata di acuerdo cu e condicion di corta 5 miyon pa luna den gasto di cuido pasobra esaki, meimei di un pandemia ta un tarea dificil pa haci. Mientras cu Aruba ta sigui discuti cu Hulanda riba e topico, Aruba ta buscando alternativanan.