Home Police Doño di e conocido cas na Shiribana a wordo maltrata riba caminda...

Doño di e conocido cas na Shiribana a wordo maltrata riba caminda , pa algun adicto ambulante

SHARE

Shiribana: Na prome instante tabata wordo papia di un auto cu lo a dal persona riba e caminda di Shiribana, pero esaki no tabata e caso.

E caso tabata cu De Mey doño di e conocido cas na Shiribana a wordo maltrata pa algun adicto ambulante.

Un dama den un auto cu tabata pasando a para pa mira kiko tabata sosodiendo a bay hala nan atencion y a wordo menasa pa e conocido adicto ambulante Eveline, mesora e la dicidi di yama polis.

E patruya di trafico a yega hopi liher na Shiribana, e dama chauffeur a splica polis, cu e tabata biniendo di pabou y e la mira algun persona ta bringando cu un meneer di edad riba caminda. E dama a hala nan atencion, pa nan no sigui maltrata e homber di edad.

Esaki no a cay den bon tera cerca e adicto Eveline di Tarabana y Eveline a cuminsa menasa e dama chauffeur bisando pa e wak su caya. E dama chauffeur a sinti’e intimida y a yama polis. Aparentemente ta trata di problema cu pago di huur, cu e adictonan aki mester a paga De Mey y no lo a cumpli cu esaki, dje lo a start un discussion cu lo a caba cu un bringamento basta fuerte riba caminda dilanti su cas. De Mey a haya basta golpi na su cara.

Ora polis a yega e conocido Eveline cu tabata para un poco mas pabou di e cas di De Mey, a busca un lift y a bay for di eybanda. E otro dos adictonan a drenta mondi bay.

Polis a cuminsa buscanan den e area di Shiribana y becindario, un poco rato despues un unidad di K9 a bin topanan na Tanki Leendert, na altura di Glen’s Place.