Oranjestad – Recientemente Kiwanis Club of Palm Beach Aruba a instala su directiva nobo pa e aña 2021-2022. E directiva nobo lo consisti di e siguiente voluntarionan:
- President – Sr. Rothmar Coenraad
- Secretary – Sr. Rossi Marchena
- Treasurer – Sr. Carlos Tapias
- Vice President – Sr. Onasito ‘Chito’ Thiel
- President Elect – Sr. Daniel Aguirre
- Immediate Past President – Sr. Richard Roy
- Director – Sr. Michael Bareño
- Director – Sr. Michel Janssen
- Director – Sr. Ben King
- Director – Sr. Robert-Jan Moons
- Director – Sr. Alvin Wever
- Director – Sr. Rhomyko Winklaar
- Director – Sr. George Wong
Na e ocasion aki e Presidente saliente, Sr. Richard Roy, den su discurso, a refleha cu e aña anterior a wordo grandemente afecta pa e Pandemia di Covid-19. Mayoria organizacionan voluntario na Aruba, incluyendo Kiwanis Palm Beach, mester a reinventa nan mes pa asina por sigui funciona y cumpli cu nan metanan proponi. Pa e reto aki e Kiwanis Club of Palm Beach a institui un “Innovation Committee” cu a bin cu ideanan nobo pa recauda fondo pa asina e club por a conta cu e medionan necesario pa sigui contribui na nos comunidad. Iniciativanan nobo a inclui: e “Kiwanis Ride for Kids” (un careda di ciclismo rond Aruba), e “Planters Project” (bendemento di baki di mata) y un “Valentine Fundraising auction”. Tambe tabata tin e campaña innovativo “5 for KIDS” cu a conta cu aporte di ambos Digicel y SETAR pa haci donacion di 5 florin via SMS! Conhunto, pa medio di e iniciativanan aki a logra recauda alrededor un suma representativo cu na su turno a keda distribui entre donacionan y projectonan social pa nos communidad. Sr. Roy a gradici tur contribuidor y sponsor cu a duna sosten na e iniciativanan aki durante temporada di Pandemia.
Ademas un logro grandi durante aña anterior tabata e lanzamento di e un Programa Educativo pa Mayor, titula “Stimami Guiami” (Stima bo Yiu, Guia bo Yiu). Esaki ta un programa educativo pa mayornan unda ta enfoca riba mehoracion di e laso entre e mayor y su yiu. E programa aki ta un colaboracaion entre Kiwanis Palm Beach, Wit Gele Kruis, Tienda di Educacion, Fundacion Pa Nos Muchanan y Fundacion Respeta Mi. E programa ta pa mayor na estado of cu baby recien naci y ta brinda informacion y assitencia den tur aspecto di cuido y guia pa yui durante un fase di desaroyo importante. Na 2021 a logra pa cumisa cu un grupo piloto cu resultadonan exitoso, pues awor Kiwanis Palm Beach y e partnernan a tuma e decision pa continua cu e programa. Finalmente, e Presidente saliente a expresa su gratitud pa e esfuerzo grandi cu e miembrecia a haci den e aña anterior. Ta aplaudi e adaptacion nan hasi door di e miembro nan pa asina por sigi juda e communidad durante e crisis di COVID19.
Como Presidente nobo pa e aña 2020-2021 a keda instala Sr. Rothmar Coenraad kende ta miembro desde aña 2017. E Presidente nobo den su discurso a afirma su dedicacion personal na e concepto di servicio pa nos communidad y sigur na e momentonan awor cu communidad kier recupera for di e temporada dificil causa pa COVID19. Den e cuadro aki e Presidente nobo a conmemora cu den historia di Kiwanis Club of Palm Beach, e Club semper a recupera for di temporadanan cu reto grandi. Esei, awor tambe, lo ta e enfoque di e aña benidero. Den e cuadro aki e Presidente nobo a subraya e concepto di “Impacto” cu ta e influencia positivo of contribucion cu e Club por duna na nos communidad. E meta principal di Kiwanis ta pa di cambia un communidad of un mucha cada bez. Pa logra esaki lo recauda fondo cu e sigiente iniciativanan: e “Kiwanis Ride for Kids” den un forma mas amplio, e popular “Kiwanis Palm Beach Masquerade Party” cu lo bai wordo organiza den un forma adapta y e popular “Kiwanis Nostagia Party” cu musica di decadanan di 60 te cu 80. E Presidente nobo a sigura cu e iniciativanan aki por hiba e club na un sigiente nivel di impacto den nos comunidad.
Finalmente, e Presidente nobo a expresa cu e tin e confiansa cu e miembronan lo sigi haci nan maximo esfuerzo pa sirbi e communidad por medio di e trabao voluntario den nan Club. Tambe, como Presidente di Kiwanis Club of Palm Beach e lo sigui cu e ehecucion di e plan strategico vigente, unda lo enfoca ariba projectonan basa ariba e resultado di necesidanan cu a resulta for di e “Community Analysis” ehectua na 2020.
E instalacion a tuma lugar den e mahestuoso ballroom di Aruba Mariott Resort durante un cena ameno y teniendo cuenta cu tur protocol di COVID-19 vigente. Kiwanis International ta un organizacion caritativo mundial, dedica na haci nos mundo mihor door di cambia un comunidad of un mucha cada bez. Mas informacion por haya riba: www.facebook.com/kiwanispalm beacharuba
