ORANJESTAD: Recientemente den un encuentro ameno Minister di Enseñansa y Deporte Endy Croes a reuni cu fundado y presidente di Bay University School of medicine, Dr. Mani Alagar y Dr. Albert J.F. Croes, MD cu ta den hunta di directiva di e scol. “E reunion a bay den un bon ambiente y tabata hopi fructifero, a dialoga riba diferente proyectonan pa Aruba y e posibilidad pa habri un sucursal di Bay University na Aruba”, e mandatario a expresa.
Ta trata aki di inversionista cu poder pa haci inversion y crea proyectonan grandi. Nan a mustra hopi interes den e districto di San Nicolas. E vision ta pa prepara mediconan pa sigui cu nan estudio den exterior despues. Alabes prepara un posibel acuerdo cu ImSan. Bay University tin plan mucho mas grandi cu e fase inicial.
E maneho cu Ministerio di Enseñansa, lo aplica como compas den e proximo 4 añanan ta e “Sustainable Development Goal” number 4; calidad di enseñansa esaki lo dirigi nos maneho pa yega na solucionnan y mehoracion den enseñansa di nos pais. Enseñansa ta un di e motornan di mas poderoso cu ta comproba cu ta garantisa desaroyo y sostenibilidad.