ORANJESTAD (AAN): Den e ultimo 35 añanan, e cuido pa persona cu limitacion intelectual na Aruba a crece y profesionalisa. Como fundacion, Ambiente Feliz ta orguyoso di por a contribui na esaki.
E fundacion ta trata di duna oido na e necesidad grandi cu tin den comunidad pa crea mas vivienda y pasa dia pa esnan cu un limitacion mental. E fundacion no por realisa esaki sin e sosten di Land Aruba.
BISHITA Y RONDLEIDING
Diabierna 15 di October representante di minister Tjon a bishita e fundacion na Santa Cruz. E representante Sra. Michella Steenvoorde-Lacle y Sra. Irina Croes a ricibi un rondleiding di e cas y e oportunidad pa combersa cu algun cliente.
Despues tabata tin e oportunidad pa combersa cu bestuur ariba e historia y mision di e fundacion, e retonan cu e fundacion ta enfrenta, e proyectonan pendiente y e manera cu e ta desea di por sigui traha cu minister Tjon y e Departamento di Asunto Social.
LOGO NOBO
Durante un conferencia di prensa e secretaria di bestuur, Sra. Satya Heinze, a comparti cu comunidad di Aruba un logo nobo cu lo bay representa e fundacion awor. E logo cu hopi conoce ta consisti di un solo. E solo por simbolisa diferente cos. Por ehempel energia y creatividad.
Pa e fundacion e solo ta simbolisa e forza cu e por duna cada uno di nos pa enfrenta e reto nan den bida diario. E forza pa kere den nos mes como persona y ta feliz.
E fundacion ainda ta para pa esaki y pesey a scoge pa un logo cu tambe ta consisti di rayo di solo. E rayonan di solo ta uni hunto dentro di un cas. E diferente color di e rayonan ta representa e diferente personanan cu ta biba of traha na Ambiente Feliz y cu ta enfrenta hunto tur reto poni nan dilanti pa asina por crea un “Ambiente Feliz”.
E fundacion ta hopi agradecido cu Sr. Sebastian Hofer di Little Island Media pa su aporte na esaki.
NOMBER PA CADA LOCALIDAD
Tambe e fundacion a opta, mirando cu awor tin 2 localidad, pa nombra cada localidad. E localidad di Santa Cruz lo wordo yama desde awe “Cas Curason”. Akinan ta unda e prome clientenan a bin pa biba na aña 1986 y hunto ta forma e curason di e fundacion.
E localidad na San Nicolas lo bay yama Cas Briyante. Eynan tambe e solo lo briya pa un total di 20 cliente nobo cu un limitacion multiple.
VIDEO NOBO
Pa comunidad ser a conoci cu e fundacion un tiki mas di cerca Ambiente Feliz lo lansa un video nobo dia 27 di October venidero cu ayudo di Sr. Semi Chahmi di Chahmi Films. Den e video e fundacion lo enfoca riba e historia, e actividadnan y su trahadornan.
E fundacion ta gradici Sr. Chahmi pa e tremendo trabou y tempo brinda na e proyecto.
CELEBRACION 35 AŇA
E 35 aña di existencia di e fundacion lo wordo celebra den grandi na unda e siman di 25 di October lo wordo yena cu diferente actividad. Clientenan lo por bay disfruta di un dushi desayuno, tratamento di cabey, un misa dedica na e fundacion, un koffiemorgen y tremendo fiesta, bustrip y mucho mas.
E empleadonan tambe lo wordo gradici pa nan dedicacion na e trabou y na e clientenan por medio di un dinner, un stoelmassage y un sunset sail.
AGRADECIMENTO
Stichting Ambiente Feliz ta agradecido cu tur nan sponsor cu lo bay yuda e fundacion haci e siman aki uno inolvidabel.
Un danki grandi ta bay na Matthew’s Beach Side Restaurant, Heaven’s Hair studio, Transcendence Aruba, Parokia di Santa Cruz, Ruth’s Cakes Aruba, Pepia Est., Divino Aruba, Romar Trading, Chogogo Tours, Coconuts Aruba, Visser Trading, Aruba Aloe Balm, Pelican Adventures Aruba, El Gaucho, Click Print y mucho mas.
Tambe e Fundacion kier a tuma e oportunidad pa gradici tur esnan cu den pasado of ainda, na un of otro manera ta sostene e fundacion. Bright Bakery y Compra NV ta 2 compania cu ta yudando e fundacion pa hopi aña caba. Ta spera di por sigui conta riba nan sosten.
Tambe kier gradici Super Food y e Super Food Cares program cu ta kere den e trabou cu e fundacion ta eherce y recien a hasi un donacion di 30.000 AWG.
Por ultimo un danki ta bay na ECA N.V. cu ta yudando e fundacion coordina tur locual tin di haber cu prensa.
E Fundacion ta haci un apelacion na comunidad pa sigui sostene Ambiente Feliz y e clientenan cu ta depende di comunidad pa asina nan tambe por ricibi e cuido y guia cu nan merece.
DONACION
Por haci un donacion na e fundacion via nan cuenta di banco na CMB cu nr: 160.004.404 bao nomber di stichting Ambiente Feliz. Por yama tambe pa mas informacion na 585-8738 y puntra pa Sra. Althea Schmidt.
