Home Politics Prome Minister Evelyn Wever-Croes: E di 5 dia di reunionnan cu...

Prome Minister Evelyn Wever-Croes: E di 5 dia di reunionnan cu stakeholders riba e tema di social: PROME BIAHA CU E VELD SOCIAAL TA HAÑA ASINA HOPI ATENCION Y INVERSION

SHARE

 

 

E di 5 dia di reunionnan cu stakeholders en conexion cu formacion di Gabinete Wever-Croes II a continua diaranson. Diferente tema a wordo trata na unda cu stakeholders den nos comunidad a haya oportunidad pa duna nan punto di bista y pensamento riba loke e proximo gobernacion entre MEP y RAIZ mester tene cuenta cu ne. 

 

Riba e tema di social a hiba discusionnan extenso principalmente riba e Sociaal Crisisplan y e Family Justice Center. Tabata tey presente un delegacion di profesional den e area aki pasobra ta hopi importante pa keda adresa e retonan social cu tin na Aruba. Un enfoke special ta wordi poni riba abuso sexual especialmente di muchanan. 

 

Prome Minister Evelyn Wever-Croes a enfatisa cu lo tin mas reunion riba e tema aki den e siguiente dianan. E sociaal crisis plan desde 2018 a haci hopi na unda cu a cuminsa cu hopi programa y proyecto. Un total di Awg. 26 million a wordo poni disponsibel y esaki ta prome biaha cu e veld sociaal ta haña asina hopi atencion y inversion. 

 

“Aworaki nos ta saliendo for di Covid cu poder di Dios. Nos ta purbando di domina e aumento cu tin aworaki di e variante Delta pero nos mester cuminsa domina e problemanan sociaal despues di Covid. Den esaki e team di experto riba tereno social ta trahando di un forma structural pa wak con pa atende”. 

 

E Family Justice Center ta un ehempel di un instancia cu a wordo crea pa atende specialmente cu e tema di abuso sexual di muchanan y con pa mesora atende cu e victima y e denuncia y pruebanan y cuminsa cu e recuperacion di e victima y su famia. 

 

“Mi a keda asombra pa e presentacion y bo por wak cu nan tin un pasion grandi pa nan trabou cual ta pone mi sinti trankil cu nos ta riba e bon caminda pasobra nos tin e veld importante aki di tema social den man di esanan cu realmente tin amor p’e”.