Home Corte Castigo combina pa dokter di cas cu a mishi cu un asistente...

Castigo combina pa dokter di cas cu a mishi cu un asistente dama

SHARE

ORANJESTAD – Awe mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra e dokter di cas A., kende ta wordo sospecha di a mishi cu dos di su asistentenan.

Aruba Native por a compronde cu Hues no ta haya legalmente proba e acusacion di 3 April 2019, caminda A. lo a mishi cu e asistente V. Hues si ta haya legalmente proba cu A., riba 19 Maart 2019 a mishi cu e asistente N. Esey a haci cu Hues a reduci e castigo exigi pa Fiscal

Dia di tratamento di e caso, 1 di Juli 2021, Fiscal a bisa cu e ta haya A. culpable di tur dos acusacion. El a exigi 150 ora di trabao pa comunidad of 75 dia sera. Tambe Fiscal a exigi 4 luna di prison condicional cu un tempo di prueba di 2 aña.

DECISION HUES

Awe mainta Hues a bisa cu no tin prueba di sosten pa e caso di e asistente V. y pesey ta declara A. liber di e acusacion di a mishi cu bilnan di V.

Pa loke ta e otro acusacion di e dama N., Hues ta haya cu aki si tabatin mishimento y cu e dokter A. a tacha e honor di N. Hues ta haya cu A. a mishi na forma no adecua cu N. cu ta ser considera como acto inmoral. Esaki ora cu A. tabata duna N. masashi pa dolor di lomba, caminda a mishi cu su bil y sunchi na su lomba. E ta haya A. culpable di haci actonan inmoral cu N. Hues tuma A. na malo pa esaki.

Pa loke ta e demanda di daño di N., Hues a declara esaki no admisibel door di e complicidad y ta laga pa esaki bay caso civil. Door cu e declara A. liber di e otro acusacion, e otro demanda no por sigui.

Hues a condena A. na un multa di 2 mil florin y si e no paga esaki, e lo mester bay 40 dia sera den prison. Hues tambe a condena A. na 80 ora di trabao pa comunidad pero condicional cu un tempo di prueba di 2 aña.