Un grupo di mercenario, consistiendo di ex soldadnan Colombiano ta esnan cu a mata e President Haitiano Jovenel Moïse.
Despues di un tiroteo pisa den e capital di Port au Prince polis a logra aresta 17 cu tawata kedando den un cas. E restonan a core drenta e embahada di Taiwan unda cu nan a wordo deteni tambe.
Den e intercambio di bala 3 a muri, mientras 8 a huy pues ta fugitivo.
No ta duidelijk te awor aki ken a planea e atake y e motibo su tras.
Esnan deteni a wordo mustra na Prensa, por a mira algun na sanger y golpia, tambe a mustra Prensa e cantidad di armanan cu a wordo haya.
Manera sa e atake a tuma luga den oranan trempan di diaranson ultimo, momento cu un grupo di hombernan arma a drenta cas di President Moïse.
E la ricibi 12 impacto di bala y nan a saca un wowo di dje.
Su casa Martine Moïse(47) apesar di a resulta seriamente herida ta stabil. E la wordo bula over pa Florida unda e ta ricibiendo tratamento medico avansa.
Un grupo di 28 homber a drenta e cas, di cual 26 ta Colombiano y dos Mericano di origen Haitiano.
Segun Media e dos Mericanonan di origen Haitiano lo tawata hunto cu e grupo pa translate o sea pa comunica na e idioma Creole of Frances. Via internet nan lo a haya e contacto.
“E mission tawata pa aresta e Presidente Jovenel Moïse. . . Y no mate”, asina Hues Clément Noël a conta Le Nouvelliste.
Segun El Tiempo di Colombia, e lo a haya algun documento den nan poder indicando cu 4 di e Colombianonan envolvi a biaha pa Republica Dominicana como turista. Esaki tawata juni 4, unda cu despues nan lo a crusa e frontera drentando Haiti.
E asesinato a causa hopi disturbio den e pais mientras a declara estado di emergencia den e pais mas pober di Zuid America. Republica Dominicana a cera su frontera cu Haiti.