Sabana Blanco y Dakota:Diaranson den oranan di anochi Polis, RST, departamento di impuesto, Douane hunto cu algun otro departamento Gubernamental a tene un entrada hudicial na dos sitio, relaciona cu practica di casinonan ilegal.
E practica di casino ilegal a bira hopi popular, durante e pandemia, cu e casinonan na Aruba mester a keda cera pa un varios E entradanan hudicial a tuma lugar na un localidad den Dakota shopping Paradise y e otro localidad ta na Sabana Blanco, panort di e Pompstation.
Na e localidad den Dakota Shopping Paradise, Fiscal di Ministerio Publico tambe tabata presente, e la drenta paden pero no a topa cu ningun persona cu lo por tabata hunga wega di placa, pero si nan a tuma varios articulo den beslag. Tur cos a cuminsa cu un tip cu autoridad a haya y despues di algun luna di investigacion extenso a haci e entrada hudicial aki.
Na e mesun momento e fiscal tambe a presenta na e localidad na Sabana Blanco. Un compania di yabi mester a wordo pidi pa asina habri e porta pa autoridad por a drenta y pa asina confisca varios articulo relaciona cu e practica di casino ilegal.
Na e localidad na Sabana Blanco autoridad a bin topa cu un cantidad di mesa y fiscal a duna ordo pa confisca tur e mesanan.
E accion grandi aki a inicia den oranan trempan di anochi y autoridad a haya cooperacion di Personal di CEA y team di aresto.
