Home Local Ann Angela di Ministerio Publico: “Corte Superior a trata e apelacion di...

Ann Angela di Ministerio Publico: “Corte Superior a trata e apelacion di Sr. Sevinger contra Hues Comisario y a dicidi cu e mester keda cera”

SHARE

Oranjestad: E siman aki Corte Superior a trata e apelacion di e parlamentario, Sr. Benny Sevinger kende ta cera na KIA contra e decision di Huez-Comisario pa cu e prolongacion di su detencion cu 60 dia mas. Corte a dicta cu Sr. Sevinger mester keda cera.

Tambe nos a haya informacion for di Sra. Ann Angela di Ministerio Publico, cu Ministerio Publicio no lo para den caminda di su eventual huramentacion si acaso bin e peticion aki y lo tuma e medidanan necesario pa facilita esaki.

Ministerio Publico no tin nada di haber cu huramentacion di un Statenlid. Esey ta keda tarea di Parlamento y Gobernador.

Sr. Benny Sevinger a wordo deteni riba diaranson 26 di mei ultimo, na momento cu e tabata sinta cu algun persona bebiendo coffee na un establecimento den De La Sallestraat. Sr. Benny Sevinger ta e sospechoso principal den e caso Avestruz. E ta wordo sospecha di varios acusacionnan serio, encuanto iregularidadnan den otorgamento di un cantidad di terenonan commercial na Aruba.

Nos lo keda pendiente pa cualkier cambio cu lo por presenta den e dianan nos dilanti, mirando cu otro siman caba e huramentacion di e Parlamento nobo di Aruba lo mester tuma lugar.