Dialuna atardi, lider MEP, Sra. Evelyn Wever Croes tabata cerca gobernador, segun su persona, nan a papia hopi, pero naturalmente no por a bay den detayes di locual a wordo papia.
Segun lider di partido MEP, Sra. Evelyn Wever Croes, MEP ta un partido cu ta habri pa traha cu tur partido den forma di un coalicion, cu excepcion di partido AVP.
E la sigui splica cu e partido AVP actualmente su filosofia, su norma y balor, ta contrario na esun di MEP. E dos partidonan grandi aki no ta alinea cu otro y pa e motibo ey no por traha cu otro.
Lider di MEP a usa algun ehempel, manera e tema di corupcion. “Nos ta combati corupcion, cosnan por pasa, pero nos ta tuma accion, coregi y percura pa preveni cu corupcion por continua.”
E lider a sigui bisa, ” contrario na MEP, e partido berde ta aplaudi, ta brasa y ta defende corupcion”. E cosnan aki no ta bay cu otro.
Otro ehempel cu Lider di MEP a usa, tabata cu AVP kier pa elimina Landsrecherche y tambe nan plan pa bay mishi cu Ministerio Publico. Eseynan ta duna tendencianan dictatorial y MEP sigur no kier forma parti di dje.
Nos mester respeta nos institutonan, e instituto di Ministerio Publico, no ta un instituto cu gobierno por drenta aden y mete. E lider di MEP a sigui bisa cu Sr Eman sa esaki, paso e la pasa aden na 2017, ora un Minister di su Gabinete a wordo cera y investiga. Esaki tabata durante cu e mes tabata Minister President, anto e tempo ey SI e no a bisa tur esaki. Awor cu tin un otro gobierno e ta tilda Ministerio Publico, Landsrecherchenan etc. tin hopi mas cos cu AVP a haci of kier haci cu no ta na su luga.
Evelyn Wever Croes a continua, “ademas nos tin hulanda hopi cerca den Reino. Hulanda ta wak tur cos cu ta pasa akinan. Bo ta kere cu di berdad Hulanda ta bay laga metemento di politiconan den Ministerio Publico, nos mester madura riba e pida baranca ‘kinan. Ora ta cumini nan ta atacha y kibra credibilidad di e institutonan aki y ora no ta cumini ta brasanan.” Asina tin hopi mas diferencia cu pa MEP ta imposibel traha cu AVP.