ORANJESTAD – Awe mainta Fiscal a exigi castigo combina pa e dokter di cas masculino A. Aruba Native por a compronde cu dokter A. ta wordo acusa di a mishi sexualmente cu su dos asistentenan femenino. E casonan tabata riba 19 Maart 2019 y 7 Februari 2019. Den Corte, dokter A. a para riba cu e ta inocente. Abogado mr. S. Kock a representa e dos asistentenan N. y V., kendenan no a presenta. Fiscal ta haya dokter A. culpable y a exigi trabao pa comunidad y castigo condicional. Abogado mr. Lejuez ta haya cu su cliente, dokter A. no ta culpable y cu e dos asistentenan a haci un set up contra dokter A.
Dokter Aljaf. a bisa Hues cu el a kita V. pa ladronicia di placa for consultorio. E tabata sinti falta di placa di su cartera pa un tempo caba y el a dicidi di instala un camera scondi y a mira V. ta coy placa. Despues di a papia cu su abogado, a kita V. Segun dokter A., tur e cosnan aki ta manera un set up contra dje.
Ta asina cu e damanan V. y N. a haci keho na AZV y HAVA contra dokter A. Segun V., e ta hayando tratamento di psycologo. Dokter A., a bisa Hues cu V. ta trahando pa un otro dokter y cu su consultorio tin relacion cu e dokter aki.
Abogado mr. S. Kock a bisa Hues cu e caso aki a afecta e damanan N. y V. masha hopi. V., despues di 8 luna di su retiro, a bolbe bay traha serca e dokter cu e tabata traha promer. V. a keda afecta pa loke dokter A. a haci cun’e y te ainda ta afecta. Pa loke ta N., e situacion tabata asina serio cu e mester a bay biba na Hulanda. Ambos ta exigi daño inmaterial di 7500 florin pa cada uno of di acuerdo na loke Hues ta haya ta husto.
Fiscal a bisa Hues cu tanto N. como V. a duna keho pero no tabatin testigo. Ta actonan inmoral cu no por permiti. Aki mester busca pruebanan di sosten. Aki tin declaracion di partner di ambos. Tin combersacion graba entre N. y dokter A. riba e forma con dokter A. a masashi su lomba, gara su bil y sunchi na su lomba. Fiscal ta haya cu esakinan ta suficiente prueba di sosten cu loke N. ta bisa ta berdad. Pa loke ta V., e ta haya cu tin suficiente prueba di sosten tambe.
Fiscal ta tene cuenta con e asistentenan a keda afecta door di loke dokter A. tabata haci cu nan. E ta haya cu mester duna un aviso na e dokter. Fiscal a exigi 150 ora di trabao pa comunidad of 75 dia sera. Tambe el a exigi 4 luna di prison di cual 2 luna ta condicional cu 2 aña di prueba.
Pa loke ta e demanda di daño inmaterial, Fiscal a bisa cu ta fastioso pasobra ta dificil pa determina con hende ta sinti. El a pidi pa declara no admisibel pa den un caso civil determina esaki.
Hues a bisa cu e ta bay studia e caso y dia 15 Juli 2021 pa 8.15 lo tin sentencia.