Diabierna awo ta haci un siman cu Aruba a bay elecion, a celebra democracia, e elecion aki tabata uno diferente. Un elecion cu lo keda marca den historia di Reino Hulandes, cu pa prome biaha den historia di Reino, un persona riba un lista politico, aresta y cera den prison a bay elecion y a saca su mes. Anto cu varios cargonan hopi pisa contra dje, entre otro corupcion, labamento di placa, valsheid ingeschrifte, fraude etc.
Na otro partinan di Reino of na otro paisnan contrario cu Aruba, nan si tin e tendencia cu automaticamente ora un parlamentario wordo acusa of sospecha di a comete un acto castigabel, e mes ta tuma su retiro boluntariamente. E ta laga e investigacion cana su caminda y si e sali liber di tur acusacion, e lo por drenta bek den politica.
Diamars ultimo a haya e resultadonan individual y diaranson a confirma e resultado y tambe cu no lo haci mas reconteo.
Pueblo di Aruba ta den un incertidumbre, especialmente e votadonan di Sr. Sevinger di AVP, mirando cu Sr. Sevinger a saca su mes y a wordo poni riba e lista emiti pa Conseho Supremo Electoral como un parlamentario den e siguiente periodo di gobernacion. Mesora a cuminsa un sin fin di lansamento di preguntanan y tur sin contesta.
Diahuebs den oranan di mainta Hoofdstembureau di Aruba a declara di a escoge e miembronan di Parlamento pa e gobernacion nobo:
Den e lista aki por a mira nomber di e parlamentario Sr. Benny Sevinger kende actualmente ta cera na KIA. E lista aki a wordo mesora cuestiona. Den e caso aki no tin niun ley cu ta bisa cu un persona sospechoso di cualke acto corupto no lo por bira parlamentario.
Awo cu e lista ta conoci, ta sigui un proceso pa traha geloofsbrieven pa e parlamentarionan nobo, esaki lo ta wordo haci pa Censo. Geloofsbrieven ta manera un tipo di screening pa mira si un persona por yega na ocupa e puesto di parlamentario. Por ehempel, bo no por tin dos trabou, e persona mester ta riba 18 aña, e mester tin nacionalidad Hulandes, un persona no ta wordo permiti pa tin un negoshi riba su nomber etc. pero den e kiesverordening no ta para cu un persona deteni y cera den prison no por bira Parlamentario.
Ora e geloofsbrievennan ta cla nan lo wordo trata pa e Parlamento saliente y si Benny su geloofsbrief wordo aproba pa e Parlamento saliente, e lo por bira un Parlamentario pa e sigiuente periodo di gobernacion. Esaki lo bira algo cu prome biaha ta sosode den Reino Hulandes.
Despues cu Parlamento aproba e geloofsbrievennan aki, nan lo wordo pasa pa Gobernador pa asina e 21 parlamentarionan nobo lo por huramenta dilanti di Gobernador.
E pregunta ta keda si Gobernador di Aruba lo huramenta e parlamentario cera na KIA, of lo nenga su huramentacion?
Si Gobernador dicidi di huramenta Sr. Benny Sevinger, unda esaki lo sosode? Gobernador lo bay te KIA pa haci e huramentacion? of CEA lo trece Sr. Sevinger cerca Gobernador pa Huramenta?
Preguntanan cu tur hende ta haciendo y no tin contesta. Ora tin Reunion di Staten, CEA lo trece Sr. Sevinger den Parlamento pa atende cu e reunion nan aki? Ministerio Publico lo permiti tur esaki? of lo laga Benny Sevinger den libertad den e proximo dianan aki, pa e por atende cu su huramentacion y tambe pa ta presente na reunionnan di Parlamento?
Y si acaso durante tratamento di su caso den corte e wordo haya culpabel y Hues dicta cu di corte e mester bay di biaha KIA pa sinta su castigo den prison. Kiko lo pasa si e no haya chens pa bay personalmente den parlamento pa tuma su retira y pase pa un otro miembro di partido, muy probablemente AVP lo perde su asiento.
E unico forma cu Aruba y partido AVP por evita tur e dilema aki, ta si Sr. Benny Sevinger dicidi riba su mes, cu e no ta tuma e puesto di parlamentario y esaki ta pasa esaki pa e siguiente candidato cu ta Sr. Candelaria.
For di un avpista di decadanan a splica nos cu tempo e partido RUBA y AVP a join, AVP a haci un combenio cu Sr. Watty Vos dfm, cu number 2 riba lista di AVP lo keda pa RUBA, dus pa famia Vos, pa e motibo aki Sr. Sevinger a ocupa number dos riba e lista di AVP. Segun e meneer aki, defunto Watty Vos tin un sobrino riba lista, cu ta Edu Vos. E la puntra su mes pakiko no a usa e number 2 di defunto Watty Vos pa a pone e sobrino riba e number dos cu ta di e partido Ruba.
Otro siman diaranson e parlamento nobo di Aruba lo huramenta. ban spera cu prome cu esaki bin un solucion y contesta husto pa tur e preguntanan cu pueblo tin.