Oranjestad – Dibierna merdia pa mas o menos 3’or Ministerio Publico e emiti un Press Release, unda ta informa cu tres sospechoso a ser laga “liber” pero tur ta bou condicionnan estricto.
Pues durante nan tratamento, Huez Comisario ta splicanan esta e tresnan cu a haya na libertad e reglanan cu nan mester mantene nan mes na dje. Tur ta keda sospechoso y por wordo yama ki ora cu ta bek door di e team investigativo di Avestruz.
Pa loke ta trata e Parlamentario y Ex Minister di partido AVP y su pareha y tambe Susebeek a keda deteni pa awor pa mas investigacion.
Manera Abogado Kock mes a bisa den un entrevista cu e ta bay ta un proceso largo, mirando cu ta un cantidad di material/prueba a acumula durante 3 aña.
Ministerio Publico:
“Diaranzon 26 mei 2021 e sospechonan O.B.S.(Benny) y C.M.C.H.(Claudia) a keda deteni.
S. ta wordo sospecha di a comete varios hechonan castigable entre otro, soborno (omkoping), abuso di cargo (ambtsmisbruik), labamento di placa (witwassen) y participacion na un organizacion criminal (deelname aan een criminele organisatie).
C.H. ta wordo sospecha di labamento di placa.
Awe(diabierna) despues di merdia huez-comisario a trata e detencion (verlenging inverzekeringstelling) di e dos sospechosonan aki.
Tur dos, tanto S. como C.H., lo keda den detencion pa awor na interes di e investigacion”.
Pieter Susebeek si no tawata tin dje suerte eynan pa haya su libertad manera e otronan, esta Arends, Abath y Every.
Pa su persona tambe Ministerio Publico a dedica un alinea.
Ministerio Publico:
“Ademas huez-comisario a trata awe despues di merdia e peticion entrega dor di Ministerio Publico tocante detencion di e sospechoso P.Th.A.S.(Susebeek).
Huez-comisario a duna ordo pa detencion (gevangenhouding) di S. y a dicidi cu e sospechoso aki tambe lo keda den detencion pa awor”.
Mester duna espacio na e investigacion y interogacionnan cana nan caminda segun nos aparato Hudicial ta indica y no trata na trece informacionnan fake dilanti, paso eseynan lo no yuda cu nada toch.
Ora ta asina leu cu e Team Investigativo di Avestruz consistiendo di recherchenan local y Hulandesnan Europeo ta completamente cla, e sospechosonan nan lo wordo presenta dilanti Rechter-commissaris y si ta ok nan tur lo wordo laga “liber” bou condicionnan kizas mescos cu e otro tresnan te ora nan caso bin dilanti den Corte di Husticia.