Oranjestad: Diabierna den careda di 3’or y mey, ministerio publico di Aruba a emiti un relato di prensa, den cual nan a duna un update di e ultimo desaroyonan den caso Avestruz.
Ministerio Publico a pidi huez-comisario pa suspende detencion di e tres sospechosonan di Caso Avestruz, F.F.A., F.P.E. y M.L.A. e libertad aki ta mara na condicionnan.
Banda di condicionnan general, huez-comisario a pone como condicion especial cu e sospechosonan ta prohibi di tin contacto cu cierto personanan y cu nan mester coopera cu e investigacion.
Esaki ta significa cu e tres personanan aki ta keda sospechoso den Caso Avestruz, nan libertad ta mara na cierto condicionnan, cu autoridad sigur lo vigilanan di hopi cerca, si nan no cumpli cabalmente cu e condicionnan pisa aki, nan lo wordo mesora aresta y encarcela te ora nan mester presenta den corte y haya nan sentencia.
Tambe e tres sospechosonan aki, mientras cu e caso Avestruz ta bou investigacion tur tres anytime lo por bolbe wordo yama pa presenta na Landsrecherche, si acaso autoridad mester di cualke declaracion.
Mas cu claro cu nan a wordo laga den libertad pa motibo cu autoridad a caba cu e parti di interogacion di e tres sospechosonan aki y no tin motibo mas pa tenenan encarcela y asina e tres sopechosonan bou condicionnan serio a wordo laga den libertad. E tres sopechosonan aki lo keda pendiente si acaso nan wordo yama pa presenta na Landsrecherche of dia nan caso bin dilanti den corte, caminda nan lo por wordo sentencia, pa e rol cu nan a hunga den e caso grandi di corupcion yama Avestruz.
Mientras tanto e investigacionnan ta sigui, actualmente tin tres otro sospechoso encarcela, e sospechoso principal Ex Minister Benny Sevinger, Claudia casa di Benny Sevinger y Pieter Susebeek.
E team di Landsrecherche hunto cu un team di recherchenan hulandes bou encargo di Hoofdofficier van Justitie ta continua cu e investigacionnan di e Caso Avestruz.
Nos ta keda pendiente pa cualke update di Caso Avestruz.