Home Local Warda Costa a intercepta tres persona ilegal riba un boto local, capitan...

Warda Costa a intercepta tres persona ilegal riba un boto local, capitan ta un homber hulandes

SHARE

Warda Costa a logra pone man, riba tres persona cu tabata tin e intencion di drenta nos isla na un forma ilegal.

Savaneta, Steunpunt di Warda Costa: Diamars, den oranan di mainta, durante patruya den awanan rond di nos isla, Warda Costa a bin topa cu un boto local actuando sospechoso, abordo tabata tin 5 persona.

Mesora a bay controla e boto local aki, riba e boto nan a bin topa cu e capitan y su ayudante ambos ta bibando na Aruba, pero e tres otro personanan tabata indocumenta, nan intencion tabata di drenta Aruba na un forma ilegal, ayuda pa e capitan y su ayudante. Por a nota cu nan tabata tin un flanel blauw bisti di Security Pool & Beach.

Tabata trata di un muhe y dos homber indocumenta, e boto registra na Aruba, A 2043  mesora a wordo treci na e steunpunt di Warda Costa na Savaneta Kemp. E capitan ta di nacionalidad hulandes biba na Aruba y su ayudante ta di nacionalidad Venezolano tambe biba na Aruba. Nan a keda aresta pa traficacion di hende y entrega den man di husticia.

E otro tres personanan ta di nacionalidad venezolano, como cu nan ta indocumenta nan a wordo busca pa Guarda Nos Costa, pa asina cuminsa haci e tramitenan pa expulsa nan bek pa Venezuela. Den e boto a bin topa cu medicinanan y varios otro cosnan cu ta prohibi.

Mark Solognier di Warda Costa a splica cu nan ta na altura di e modus operandi di algun boto local, cu ta bay pazuid, pa busca mercancia of busca hende y trece nan na un forma ilegal. E la bisa tambe, cu nan ta hayando bon cooperacion di basta piscadonan local atento, cu manera nan mira movecionnan straño riba lama, mesora ta bati alarma.

Warda Costa lo sigui patruya y controla e awanan rond di nos isla, pa asina evita cu hendenan ilegal, of productonan ilegal ta drenta nos isla. Warda Costa su radarnan ta activo y asina nan por keda controla y ta atento riba cualke movecion sospechoso.

Warda Costa su number ta 913, e number di contacto aki, por yama semper ora di meld cualke movecion straño of sospechoso riba lama.

Warda Costa ta agradecido cu e cooperacion cu nan ta ricibiendo di e pueblo Arubano y ta pidi pa sigui dunanan e cooperacion di semper door di meld tur movecion straño of sospechoso riba lama, batiendo alarma sigur ta yuda den combati criminalidad y mantene nos isla mas sigur.