Home Politics Minister Andin Bikker a apunta Gino Winklaar formalmente como director permanente di...

Minister Andin Bikker a apunta Gino Winklaar formalmente como director permanente di KIA A otorge su Landsbesluit

SHARE

Recientemente Minister di Husticia, Siguridad y Integracion, mr. Andin Bikker, a entrega e decreto nacional (Landsbesluit) di e nombracion como director di Korrectie Instituut Aruba (KIA) na Gino Winklaar. Esaki a sosode den presencia di varios otro hefenan di departamento di husticia. Cu e decreto aki den man, awor si e proceso di nombracion a keda cla formalmente. 

 

Minister Andin Bikker a felicita Gino Winklaar pa su esfuerso, dedicacion y perseverancia den e trabou. E mandatario a subraya cu tabatin hopi reto na KIA, un departamento cu tabata mester di hopi atencion debi cu ora a asumi gobernacion na fin di 2017 a resulta cu desde 2010 pa 2017 KIA no a haya e debido atencion. Pues sr. Winklaar a encontra un situacion dificil, pero cu sosten di Ministerio di Husticia, Parlamento, Majoor Sergio Quant, dr. Verschuur y e personal di KIA, a logra avancenan importante y positivo na KIA. Na momento di nombra Gino Winklaar den e funcion, a sinti un mehoracion y cu e retonan a minimalisa. A bay asina bon cu aña pasa a hasta haya un rapport positivo di Inspectie di Husticia di Hulanda, algo cu nunca cu pa varios aña no a logra. 

 

Gino Winklaar mes a gradici Minister Andin Bikker pa e confiansa brinda den dje. El a reconoce ex-altocomisario Dolfi Richardson como su mentor den Cuerpo Policial y sin lubida su mesun tata, cu ta su mentor principal. Winklaar ta considera su exito na KIA como un exito comparti. Si no ta pa e ekipo cu tin eyden cu ta yud’e tur dia, e lo no a yega unda cu e ta awe. KIA ta un departamento cu tin su retonan y cu ta rekeri hopi esfuerso diario pa mantene e operacion canando. 

 

Awor mas bien mester sigui traha duro pa por alcansa e logronan cu a fiha pa KIA y pa e empleadonan eyden. E meta semper ta pa, den e proceso di encarcelacion, dedica e atencion necesario na e presonan pa nan sali como un miho ciudadano di nos pais despues di cumpli cu nan castigo.