Tanki Flip/ Tanki Leendert;
Dialuna durante ora di cierre, dos snacktruck ta bira victima di atraco arma, ta trata di Welldone Snacktruck pariba di rotonde Tanki Flip y algun minuut despues Ruiz Take away pariba di rotonde Tanki Leendert.
Den careda di 11’or di anochi, e dama cu ta traha na Welldone Snack truck a wordo sorpresa pa tres atracado basta hoben. Tur tres tabata bisti na preto, un tabata tin un arma di candela y e dos otro nan tabata den posesion di un cuchiu.
E señora a spanta y despues di a duna nan e 200 florin cu tabata tin den e caha nan a bandona e sitio.
Mas o menos 15 minuut despues, Ruiz Take Away pariba di rotonde Tanki Leendert, tambe ta bati alarma, pa motibo cu nan tambe a bira victima di atraco. E mesun tres atracadonan hoben a bay na Ruiz Take away y aki tambe despues cu nan a haya locual tabata tin den e caha, nan a bandona e sitio, nan a bay na pia direcion zuid patras di Ruiz Take Away.
Na Welldone Snacktruck nan a bay cu 200 florin cu tabata tin den e caha y na Ruiz Take away nan a haya solamente 100 florin mirando cu e caha tabata cera caba. Recherchenan di atraco team a bay na ambos Snacktruck y a cuminsa cu un investigacion
E atracadonan tabata un mucha homber hoben Chines y dos otro mucha homber local, bruin cla, nan tur tres ta papia bon papiamento. Polis ya caba tin un pista ken e atracadonan aki.
Varios unidad di polis y team di recherche ta riba caya buscando e tres hobennan aki, nan ta parando varios auto y ta haciendo controlnan rigoroso. Por spera den un momento pa otro, cu nan lo por pone man riba e tres hobennan aki.
