Home Local APA ta contento di anuncia: Celebrity Cruises cla pa cuminsa nabega atrobe

APA ta contento di anuncia: Celebrity Cruises cla pa cuminsa nabega atrobe

SHARE

“Nos ta net un aña despues y ta importante pa rebiba economia atrobe. E decision di Celebrity Cruises a yega na bon momento y ta un bon noticia pa nos turismo y nos economia”, asina Marc Figaroa, director di Aruba Ports Authority N.V. (APA) a declara den fin di siman. Yegada di cruceronan atrobe na nos isla ta traduci den mas entrada y un inyeccion directo den nos economia, pa tur cu ta depende di turismo.

Diabierna ultimo Celebrity Cruises a anuncia su regreso tan spera den e mundo di crucero, segun cu e presidente y CEO, Lisa Lutoff-Perlo a confirma. E crucero revolucionario Celebrity Millenium, na cabes di un programa di modernisacion di e flota na balor di 500 miyon dollar, lo sali for di waf di St. Maarten entrante dia 5 di juni 2021.

Pa dia 25 di maart, biaheronan ansioso por converti nan soño bira realidad, ora cu habri e reservacionnan pa itinerario nobo di shete anochi, cu lo sali te cu augustus pa algun di e destinacionnan mas gusta den Caribe. E crucero lo nabega cu tripulacion vacuna caba y lo ta disponibel pa huespednan adulto vacuna y muchanan te cu 18 aña cu un resultado negativo di PCR test haci 72 ora prome cu e biahe.

Presidente y CEO di Celebrity Cruises, Lisa Lutoff-Perlo a bisa: “Bayendo bek den Caribe despues di mas di un aña ta un momento hopi importante pa nos. E ta marca comienso di e final di loke tabata un momento excepcionalmente desafiante pa nos tur”.

Crucero den Caribe: loke ta destaca mas di e experiencia
E temporada nobo di crucero den Caribe di Celebrity, ta ofrece un siman di placer riba un crucero di luho cu experiencia gastronomico di clase mundial, espectaculonan emocionante y cambernan elegante, tur mientras cu bo ta disfruta di solo, cultura y historia di algun di e islanan mas bunita di mundo.

E revolucion di Celebrity
For di e dek pa e mast, Celebrity Millennium a pasa door di un di e renobacionnan di mas grandi den historia, pa garantisa un experiencia nobo di luho incomparabel pa e pasaheronan. E crucero awo ta conta cu cambernan nobo, restaurant y salanan recien ekipa y un spa rediseña cu ta ofrece e huespednan formanan incomparabel di relaha y recarga e energianan.

Algun di e mehoracionnan adicional abordo ta inclui:
● Camber y suitenan contemporaneo completamente rediseña inspira den e diseñonan di e diseñado di interior galardona, Kelly Hoppen pa Celebrity Edge y cu clechinan di eXhale di Celebrity cu su corchonnan luhoso Cashmere ™;
● Restaurant, bar y salanan increiblemente renoba unda cu huespednan por disfruta di experiencianan culinario inigualabel den un ambiente cautivador.
● Boutique nan nobo cu nomber di e diseñadonan mas popular.
● Tecnologia di blokeo RFID avansa di Celebrity di acceso cu un yabi digital pa cada porta di e cambernan.

Saludabel riba lama
E prome prioridad di e compania ta salud y siguridad di e pasaheronan, e tripulacion y personanan den e luganan cu ta bishita nan barco. Celebrity Millennium lo nabega cu medidanan integral di salud y siguridad di multiple nivel, desaroya pa e guia experto di Healthy Sail Panel di Royal Caribbean Group y e director global di salud publico y director medico, como tambe autoridadnan gubernamental y di salud local. E medidanan aki, incluyendo e rekisitonan di vacunacion, lo evoluciona di acuerdo cu e standardnan actual di salud publico.

E detayenan riba tur e medidanan di salud y siguridad
Ademas cu e huespednan mester cumpli cu e biahenan di St. Maarten, rekisitonan cu actualmente ta inclui presenta un PCR test negativo tuma 72 ora prome cu yegada riba e isla. Simplificando e experiencia di vakantie di luho, WiFi, bebida y tips awo ta “Semper Inclui” riba tur crucero di Celebrity. Ademas, e programa “Celebrity Cruise cu confiansa” ta ofrece cancelacionnan flexibel y garantia di e miho prijs. Tambe mester pone enfasis cu e crucero mester cumpli cu e protocol nan estricto di Aruba.

Un esfuerso entre Gobierno, APA y ATA
Pa por a logra esaki cu Royal Caribbean Group tabatin bastante dialogonan entre Ministerio di Turismo, ehecutivonan di Aruba Tourism Authority y Aruba Ports Authority. Aruba a mustra disponibilidad pa traha hunto cu e crucero y autoridadnan di salud, pa hunto haci e bishitanan aki posibel. Un biaha mas ta keda demostra cu Aruba ta keda un di destinacionnan preferi den turismo crucero y sin kita afo e reconocemento di forma cu Aruba ta manehando e crisis. Ta spera e crucero dos biaha pa luna na Aruba, desde luna di juni caba.