Home Corte Fiscal a bisa: “cu Danies no ta bon di cabez”, Danies...

Fiscal a bisa: “cu Danies no ta bon di cabez”, Danies a bisa Hues: ” cu e ta tuma accion pasobra Procurador General a bis’e”

SHARE

ORANJESTAD – Awe mainta Corte di Husticia a trata e casonan penal cu Ministerio Publico a cuminsa contra R.Danies. Entre e acusacionnan ta e spuitmento di “Aruba pro pedofile”, e manifestacion cu a tene caminda a resisti contra detencion, e incidente dilanti Kabinete di Gobernador, 7 biaha a viola e ley di toque de queda, a insulta agente di Polis, a menaza su mama, a menaza agente di Polis.

Arubanative por a compronde cu tratamento di e caso tabata via videoconference. Hues a puntra Danies un serie di pregunta riba e incidentenan y Danies cada vez tabata bisa Hues cu na 2016 e tabatin combersacion cu e Procurador General y ta haciendo loke Procurador General a bis’e. Hues a keda haci Danies preguntanan y cada vez e ta bisa Hues cu bay puntra e Procurador General.

E acusacionnan contra Danies ta: 30 September 2020 a menaza hende cu morto y instiga hende, 28 Juli 2015 intencional a destrui propiedad di un banco y un departamento di Gobierno. A destrui propiedad di Gobierno riba 5 April 2016 y 13 April 2016 departamentonan di Gobierno. 13 April 2016 na warda di Polis na Noord y 2 Mei 2016 warda na Santa Cruz. Esakinan ta e spuitmento di “Aruba pro Pedofile”. Ademas el a viola ley di toque di queda 28, 30 y 31 Augustus 2020 y 3, 4, 5, 6 September 2020. Tambe tin e caso di 3 Juli 2020, caminda Fiscal ta acusa D. di a menaza un agente di Polis cu morto. Danies lo a expresa: “Bay den … bo mama, yiu di …. No worry, mi sa unda bo ta biba. Mi lo topa bo back riba caya y lo bo wak kico lo pasa cu bo. Bo no ta bay scapa mi. Mi ta bay prepara pa bo. Bo bida ta den peliger”.

27 Juli 2020 , Danies a resisti contra detencion di 3 agente di Polis. Tambe cu publicamente a insulta Polis. 27 Juli 2020 a pone spandoek dilanti Kabinete di Gobernador sin permiso di minister.

Hues a mustra cu segun e raport di psychiater di December 2020, Danies ta sufri di problema mental y e no ta completo responsabel pa loke el a haci. Danies a bisa Hues cu e psychiater mester a bis’e esey den su cara. El a bisa cu ta e psychiater su cabez no ta bon.

Fiscal a mustra cu Danies kier tuma ley den su man ora e no ta haya su kier. El a mustra cu Danies, door di su problema mental, a interpreta Procurador General completamente robez. El a exigi 270 dia di prison, kitando e tempo cu Danies ta sera den KIA. Fiscal a exigi pa e casonan di violacion di toque de queda, 98 dia pero condicional cu un tempo di prueba di 3 aña y bou guia di Reclasering. Fiscal a exigi pa prohibi D. pa bay den sercania di e cas den Venezuelastraat caminda su mama ta biba.

Tambe Fiscal a bisa cu D. lo mester haya tratamento durante e tempo di prueba di Respaldo. Hues a bisa cu dia 26 di Maart 2021 lo tin sentencia.