Diamars 16 februari 2021 den un reunion di Comision fiho di Asuntonan Social y Famia hunto cu Comision fiho Salud y Cuido di nos Grandinan nos a haci un bishita na Stichting Algemene Bejaardenzorg Aruba (S.A.B.A.). E intencion di e bishita di trabou aki tabata pa nos conoce y compronde un tiki mas mihor e funcion importante cu S.A.B.A. tin na Aruba.
S.A.B.A. tin un rol hopi esencial den nos comunidad. Pa medio di un presentacion amplio parlamentarionan a haya un ilustracion di S.A.B.A. su plannan, exitonan y retonan. Durante e presentacion por a mira cu S.A.B.A. ta traha cu un team di profesionalnan pa asina brinda e mihor cuido posibel na nos grandinan. Nos a keda informa di instrumentonan cu falta ainda na SABA, nos a toca temanan manera e.o., demencia, situacion di COVID-19 y proyectonan nobo.
Nos como parlamentario a keda positivamente impreciona cu e trabounan cu S.A.B.A. ta haci pa nos grandinan. Tin puntonan cu a wordo menciona cu sigur nos lo tene cuenta cun’e na momento di trata e presupuesto di pais Aruba. Pa finalisa nos ta gradici S.A.B.A. pa e tremendo presentacion y e trabou cu team completo di S.A.B.A. ta haciendo di curason pa nos grandinan. Mi ta pidi comunidad di Aruba pa pone extra atencion na bo sernan keri y vooral bo grandinan, y en caso cu ta ripara cambio den comportacion, por ehempel lubida, no duda den tuma contacto cu SABA 5842201 of Centro di Memoria na 597-434.