Home Corte Capitan a haya 15 aña: 12 aña di prison pa grupo riba...

Capitan a haya 15 aña: 12 aña di prison pa grupo riba barco Aressa cu mas di 5 mil kilo di cocaina

SHARE

ORANJESTAD – Awe mainta Hues di Corte di Husticia di Aruba a dicta sentencia den e caso penal cu Ministerio Publico a cuminsa contra e grupo di Montenegro cu a wordo gara door di Guarda Costa riba e barco Aressa cu mas di 5 mil kilo di ocaina.

Aruba Native por a compronde cu e sentencia tabata via video conference. Hues a haya e capitan Z.D. culpable y tambe e grupo di 9 tripulante.

Hues a duna su opinion riba e discusion si  Fiscal no ta admisibel door cu a wanta documentonan intencional atras pa perhudica e sospechosonan. Hues no ta haya esey proba. Hues a sigui bisa cu e no ta haya proba tampoco cu lo tabatin deal haci cu e hefe mecanico M.D. pa duna declaracion. Tampoco cu M.D. lo ta un agente.

Hues a mustra cu e capitan Z.D. tabatin contacto cu esnan di e droga y unda mester hiba esaki. Hues ta haya proba cu e capitan ta culpable di importacion, exportacion di droga. Hues a bisa cu e no ta kere cu e droga a wordo poni abordo na rio Orinoco manera e capitan a bisa. Hues ta kere e declaracion di M.D., kende a bisa cu nan tur tabata sa di e traficacion di droga. Pa e grupo di 9 cu a wordo parti den dos, Hues ta haya e grupo complice di e traficacion. Nan tabata sa na Punto Fijo cu lo bay transporta 5 mil Kilo di cocaina. Tur a yuda trece e saconan di droga abordo. Haya nan culpable di a transporta droga.

Pa cu e castigo, Hues a mustra cu cocaina ta malo pa salud di hende. Mirando e cantidad esaki lo ta destina pa traficacion y venta cual ta crea hopi problema di criminalidad pa comunidad. Hues ta haya cu e grupo completo a contribui na esaki cu nan comportacion. Hues a tene cuenta cu castigo cu Hof ta duna y a confirma e exigencia di Fiscal. Hues a condena e capitan Z.D. na 15 aña di prison y e grupo di 9 tripulante na 12 aña di prison.