Natural Bridge: Diabierna algo pasa di 11’or di mainta, polis a ricibi un informacion cu lo tin pakinan ta drief den lama entre Natural Bridge cu Andicuri.
Mesora a manda varios patruya na e sitio, na yegada mesora nan a cera e entrada di Natural Bridge pa asina cuminsa cu nan investigacion. Probablemente nan lo a haya varios paki di droga den lama.
Maritiem Politie tambe a yega na e sitio y mesora a cuminsa busca pa mas paki di droga den e area, nan a cana na pia for di Natural Bridge bay te Andicuri pero no a logra haya niun paki mas.Tambe un patruya a drenta via Santa Lucia y a core banda di e costa for di Black Stone Beach te Andicuri tampoco no lo a topa cu niun paki.
Departamento di recherche di droga a yega na e sitio pa asina confisca e droga pa mas investigacion.
Den careda di 12’or y 45 di merdia, vocero policial a manda un informacion oficial:
Droga encontra na altura di Natural Bridge.
Pa 11 ‘or di mainta Central di Polis a haya un yamada cu na altura di Natural Bridge personanan lo a wak pakinan di droga ta drief.
Mesora a bay na e sitio y enberdad a bin encontra dos paki cu probablemente ta marihuana.
E pakinan a wordo confisca y entrega na e Seccion di Crimen Organisa di Cuerpo Policial.
Pa Cuerpo Policial por resolve mas caso cooperacion y informacion di pueblo di Aruba ta hopi importante pesey nos ta pidi si bo tin cualkier informacion jama nos tiplijn: 11141. Nos ta garantisa cu bo ta keda anonimo.
