Home Corte Abogado mr. de Hoogd a pidi Hues pa scucha hasta Polis den...

Abogado mr. de Hoogd a pidi Hues pa scucha hasta Polis den e testigonan Caso di Warda Costa a confisca 700 kilo di pisca tin rabo

SHARE

ORANJESTAD – Awe mainta e caso penal cu Ministerio Publico a cuminsa contra e homber A.L., no a sigui.

Aruba Native por a compronde cu tabatin un discusion pisa entre abogado mr. de Hoogd y Fiscal riba con Warda Costa a confisca e 700 kilo di pisca. Abogado mr. de Hoogd a hasta señala cu tabatin hortamento di en total 260 kilo di pisa na waf di Warda Costa.

E acusacionnan cu Fiscal a presenta den sala di Corte contra e homber A.L. ta cu dia 28 Augustus 2020 a viola e ley di Calamidad. A haci contacto pafor di awa territorial di Aruba cu un of mas boto di otro pais pa carga mas di 600 kilo di pisca riba su boto. E ta wordo acusa di a drenta Aruba cu pisca sin permiso di Havenmeester riba e mesun fecha. Riba 5 September 2020 el a bolbe viola e ley di Calamidad. E biaha aki tabata 700 kilo di pisca.

Den sala di Corte tabata presente abogado mr. de Hoogd pero su cliente A.L. no a presenta. E abogado a bisa Hues cu parce cu A.L. tin kentura y segun e protocol di Covid, e lo no wordo permiti pa drenta edificio di Corte.

Abogado mr. de Hoogd a pidi Hues pa scucha un cantidad di testigo pa e di dos acusacion, esta e 700 kilo di pisca cu a keda confisca.

Mr. de Hoogd a splica, e motibo cu e kier scucha e testigonan ta pa tin un bon proceso di Corte y pa tin claridad di e caso.

Hues a dicidi pa trata e parti di peticion di scucha testigonan.

Mr. de Hoogd a mustra cu na e pier di Centro di Pisca, a pisa 700 kilo di pisca. El a señala cu na waf di Warda Costa, nan a purba pa A.L. no ta presente ora di pisa, pero no a logra. A pisa menos, esta 585 kilo. Hasta a pidi asistencia di Polis pasobra tabata falta icejug di pisca. E abogado a remarca cu tur esaki no ta poni den e procesverbaal di Warda Costa. E ta puntra, kico a pasa cu e 115 kilo di pisca. Tambe el a señala cu Serlimar Parkietenbos a destrui 440 kilo di pisca. Unda e resto di 145 kilo di pisca a keda. En total ta 260 kilo di pisca a disparce, promer cu e lote di pisca a wordo destrui.  E abogado tambe ta pidi pa scucha e Havenmeester cu por splica cu piscadornan local no mester notifica cu nan a trece pisca aden. Esey ta conta solamente pa otro botonan. Esey ta nifica cu A.L. no a actua incorecto. Ademas e abogado a mustra cu for di e imagennan di radar por mira bon cla cu A.L. no a tuma over pisca for di otro boto.

Fiscal a bisa Hues cu loke abogado ta mustra ta papia tocante confisca piscanan y no tin nada di haci cu e caso mes. E ta haya cu e abogado mester a haci un otro demanda e ora. Na opinion di Fiscal, Warda Costa a traha raport di loke a sosode riba laman. E no ta haya relevante pa scucha esnan cu tabata para na waf ora e boto a drenta. E hecho cu e cantidad di pisca no ta cuadra, no ta relevante. Fiscal tambe a bisa cu Warda Costa no tin imagennan di radar di Augustus 2020 pasobra te cierto tempo ta warda esakinan.

Abogado mr. de Hoogd a reacciona cu loke Fiscal ta papia ta coy kens. El a splica Hues cu no por cuminsa un caso contra loke a confisca pasobra e pisca a wordo confisca y destrui di biaha. E no ta algo cu a bay warda. El a sigui bisa cu e boto a wordo confisca y a acerca Fiscal pa laga e boto bay. E abogado ta haya cu no ta asina cu no tin imagennan di radar di Augustus 2020. E ta haya cu Fiscal ta purba sconde cosnan. El a pidi Hues pa instrui Fiscal pa busca e imagennan for di Warda Costa cu mester tin esakinan.

Hues a dicidi di studia e caso y otro siman 18 Februari 2021 pa 8.15, e lo tuma su decision riba e peticionnan di abogado mr. de Hoogd.