RIVM ta confirma cu Aruba tin mas caso nobo e variante Reino Uni

Oranjestad, 9 Februari, 2021 – Crisis Team Covid-19 di Gobierno di Aruba ta desea di informa cu RIVM ta confirma cu Aruba tin mas caso di e variante di Reino Uni. Den nan ultimo analisis di e testnan cu a ser manda Hulanda nan ta confirma cu a detecta 5 caso mas. Pues e total di casonan awor identifica na Aruba di e variante di Reino Uni di Covid-19 a bira 10 y tambe a detecta 3 caso di e variante di California West Coast. Ta urgi un i tur den nos comunidad pa sigui aplica e reglanan ya conoci manera; distanciamente social, uzo di tapaboca, y laba man frecuentemente. Na trabao mester mantene distancia adecuado di 1.5 meter di otro na tur momento y haci uzo di tapaboca. Ora cu bo ta haci bo diligencianan, sea hopi prudente cu kiko bo ta mishi, ora cu bo ta bay sali di cualkier establecimento; laba man cu hand santizer promer cu subi auto. Si bo tin sintoma, no bay traha, yama bo dokter di cas pa haci test. Ta solamente cu solidaridad y diciplina pa cumpli cu e regla y medidanan nos lo vence e pandemia.