Awe 9 di februari 2021 partido MEP ta celebra su 50 aña di existencia; 50 aña di lucha y sacrificio, 50 aña na defensa di e pueblo Arubano, pero tambe 50 aña di logronan historico pa pais Aruba.
Dia 9 di februari 1971 Betico Croes dfm a funda e partido Movimiento Electoral di Pueblo (MEP). Desde principio caba partido MEP a pone su dilanti e ideologia social-democrata, nos structura estatal y un union di henter e pueblo Arubano, sin distincion di rasa, color, religion, status social etc. Den apenas 3 luna di tempo e partido aki a logra haya un tercera parti di e electorado Arubano, esta 7 asiento. For di e tempo ey MEP a sigui crece, tanto den voto como den cantidad di asientonan.
MEP ta wordo considera como un partido prestigioso. Un partido cu desde su fundacion a keda un partido grandi y esaki durante 50 aña largo, ya cu MEP despues di su promer salida na 1971 nunca a yega di baha bao di 7 asiento den eleccionnan di Eilandsraad y Staten di Aruba. Y den eleccionnan di Staten di Antiyas semper MEP a saca 5 di e 8 asientonan. Den henter Reino Hulandes no tin un partido politico cu un trayectoria asina impresionante!
MEP a conoce 3 lider
MEP ta un partido cu desde su fundacion te cu awor apenas a conoce tres lider, esta Betico Croes dfm, Nelson Oduber y nos actual lider Evelyn Wever-Croes. MEP ta un partido di cual despues di morto di su lider a wordo bisa den un vespertino Hulandes “Betico dood, MEP dood”. Sinembargo desde 1986 partido MEP a sigui crece den un forma grandioso, estableciendo recordnan impresionante durante e eleccionnan na 2001 y 2005 cu mayorianan absoluto.
Pa yega na un trayectoria impresionante asina ta evidente cu e partido mester a haci hopi cos bon pa e comunidad aki. Y esey MEP a haci den un forma cu no ta laga duda atras.
Durante e ultimo 50 añanan partido MEP a traha incansablemente pa e desaroyo di Aruba, tanto riba tereno estatal, economico, social, cultural, deportivo etc. MEP como un partido cu ideologia social democrata semper a tene na bista cu e pueblo Arubano y specialmente esnan di menos recurso mester ta central den e desaroyo aki.
Logronan estatal
Riba e tereno estatal nos partido tabatin problemanan serio cu e sistema politico di e structura di Antiyas Hulandes ya cu Aruba tabata den minoria compara cu e isla mas grandi, esta Corsou. Despues di su promer salida exitoso na 1971 Betico Croes, otro miembronan di partido y e militancia a pasa den temponan masha duro mes na unda nan mester a hiba un lucha tenaz contra esnan cu semper a pone trampanan den caminda pa nos no logra nos libertad, esta nos Status Aparte. Danki na su carisma, perseverancia y determinacion combina cu e respaldo incondicional di su pueblo, Betico Croes y MEP a logra pone e politiconan Antiyano y Hulandes y hasta su opositornan local respeta deseo di pueblo. Pa por a yega asina leu MEP mester a haci hopi sacrificio, drama sanger, sodor y lagrima pa realisa e anhelo di nos pueblo pa su libertad.
MEP ta e partido cu a percura pa nos simbolonan di union y libertad, esta Himno y Bandera, nos moneda, nos ortografia, nos propio Constitucion, Gobierno, Parlamento, nos propio Gobernador, Banco Central etc.
Referendum y Augustus Scur
E referendum di 25 maart 1977 y e accionnan di augustus 1977 tabata determinante den e lucha pa Status Aparte y ta danki na e accionnan aki Aruba a wordo scucha door di Hulanda.
Finalmente e deseo di Aruba a wordo cumpli durante e Conferencia di Mesa Rondo na Maart 1983 na unda nos derecho di autodeterminacion a ser reconoci y aproba pa nos sali for di Antiyas dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda. E fecha di Independencia a wordo impone riba Aruba pa por a sali for di Antiyas. E tempo ey Betico Croes a bisa bon cla cu MEP lo acepta por lo pronto e condicion aki, pero cu nos lo bolbe. Y ta cu honor dia 13 di juli 1990 ex-Minister President Nelson Oduber a percura pa scrap e fecha di Independencia 1996 for di den Statuut, pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento, cual ta un garantia solido y responsabel.
Otro logronan importante di MEP
E proyectonan cu a wordo ehecuta door di e gobiernonan di MEP durante e ultimo 50 añanan ta innumerabel. Echo ta cu ta danki na e logro di Status Aparte na 1986 cu MEP a realisa, Aruba a haya e instrumentonan economico pa por logra desaroya e pais aki. MEP ta wordo considera un partido constructor y realisador ya cu durante gobernacionnan di MEP un gran cantidad di proyecto a ser ehecuta: Practicamente tur e casnan social a wordo construi pa MEP, Complehonan deportivo, edificionan di gobierno, construccion y renobacion di scolnan, institucion di tur e empresanan estatal, waf di container, Plan Sasaki, wardanan di polis, careteranan, teleshopnan, casnan di cuido, centro medico, parke di Molina di biento, e unico hotel di 5 strea Ritz Carlton etc. Tur e proyectonan aki ta visibel pa un y tur den comunidad.
Coastal, SACE y Plant NV
Un otro logro importante tabata e reapertura di e refineria cu Coastal na 1991. Tambe e firmamento di un acuerdo cu ‘SACE’, unda a trece un solucion den e problema di garantianan hotelero. E acuerdo cu Hulanda na unda 250 miyon florin di Plant N.V. a pasa pa Aruba ta un logro historico den cual ta demostra un biaha mas cu MEP semper a goberna cu curashi, perseverancia y determinacion.
Gradicimento
Awe cu MEP ta cumpli 50 aña un gradicimento ta bay na un y tur cu a funda y guia e partido manera Betico Croes dfm, nos lider honorario Nelson Oduber, nos lider actual Evelyn Wever Croes, tur cu a participa riba lista di partido den tur e 50 añanan, Conseho y Directiva di partido, lidernan di bario, presidentenan, Forza Femenino Grace, HOT, nos votadornan y un y tur cu a sostene MEP durante 50 aña largo. Na esnan cu a aparece riba lista y cu a bay laga nos, un palabra di gratitud y aprecio pa tur locual nan a haci pa MEP y cu nos Creador duna nan sosiego eterno.
MEP semper di pueblo, cu pueblo y pa pueblo. Pabien Aruba.